Lumba bot laju nyadi lumba ti ikonik, dikerindu semua bansa. - Berita Iban Online | Laman Web Berita Kitai

Header Ads

  • Baru Nyadi

    Lumba bot laju nyadi lumba ti ikonik, dikerindu semua bansa.

    KAPIT: Kaban Kunsil Nengeri (ADUN) Bukit Goram Jefferson Jamit Unyat madahka Kapit endang tebilang nyadi palan ngatur lumba ai.

    “Tetiap taun, kitai bisi ngatur Safari Rakit Baleh-Kapit, ba ujung minggu keterubah bulan April lalu udah nya lumba bot laju dua kali setaun.

    “Lumba ai kelebih agi lumba bot laju udah nyadi lumba ikonik ditu. Lumba tu dikerindu semua bansa, ukai semina bansa Dayak aja, tang mega bansa China enggau Melayu.

    “Mayuh kelab bot laju udah ditumbuh. Peranak menua tu endang bisi penau sereta chukup landik nempa enggau ngeban bot laju enggau standard ke tinggi. Tambah mega, sida chukup pintar ngubah injin tauka injin pam sida dikena belumba,” ku Jamit.

    Ku iya, lumba perau dikerindu semua renggat umur. Bala nembiak mega enda tinggal ngaul diri dalam lumba nya. Tu manah endar dikena ngelimpangka sida ari penanggul rama sereta ngansah penau enggau pengelandik jari sida ba pekara mekanikal injin enggau langkar perau. Tambah mega, sungai nyadi jalai penyambung besai peranak ditu mansang tauka pulai ari pasar.

    Nangkan nya ku iya, lumba bot laju nyadi lumba ai kasar ti begunaka penyikar enggau pengelandik ngemudi bot. Di Kapit, peranak ditu ngayanka pengangkun raban nembiak enggau sida ke besai tuai nyengkaum kaban politik.

    Beribu iku nyengkaum Sapit Kepala Menteri Sarawak Tan Sri Datuk Amar dr James Jemut Masing, Kaban Parlimen (MP) Ulu Rajang Datuk Wilson Ugak Kumbong, Jefferson Jamit Unyat sereta bala temuai dipebasa ke bukai bela sampal meda pekit lumba bot laju kena pagi Hari Minggu tu tadi.

    Bisi 47 buah bot udah rejista masuk pekit. Sida tu datai ari pelilih Kapit enggau Song.

    Pemutus sepuluh bengkah lumba iya nya gelar champion Bot Tunnel baruh 50HP dipenggi Green Hornet 36, Black Sparrow 78 ba penuduk lumur dua lalu Tim Song penuduk ketiga seraya Alta Belos 46 enggau Majau 94 menggi penuduk keempat enggau kelima.

    Ba kategori Bot Tunnel, 30HP Orion 13 dipadu bulih gelar champion, KJM 33 bulih lumur dua, Green Hornet 36 lumur tiga seraya Antu Rayau 36 ba penuduk keempat.

    BGRT 68 bulih gelar champion ba kategori 35HP 2 Piston Tunner, HR Speed 16 lumur dua seraya Antu Rayau 36 lumur tiga.

    Kategori lumba Bot Tunnel 18HP, gelar champion dipenggi GB Group 31, lumur dua Tim Song 09, lumur tiga Antu Rayay 36 seraya Buwing Warrior 81 enggau KKRT 5 ba penuduk keempat enggau kelima.

    Kategori Injin Pam 8HP, Majeniezs E 66 bulih gelar champion, Majeniezs S77 kedua, Pesaka Baleh 49 ketiga seraya Majeniezs enggau Mild Seven 98 bulih penuduk keempat enggau kelima.

    Kesemua pemenang nerima perais mata duit, trofi enggau setepikit.

    Masing, Ugak enggau Jamit bela dipebasa nyuaka perais ngagai bala pemenang.

    Dikeranjai: Utusan Borneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads