25 kandang endur di Sibu udah digazet tanah NCR. - Berita Iban Online | Laman Web Berita Kitai

Header Ads

  • Baru Nyadi

    25 kandang endur di Sibu udah digazet tanah NCR.

    SIBU: Sepenyampau 120, 574 hektar tanah ti mungkur 51 kandang endur di sitak Sibu udah disukat nengah Program Nyukat Kelingi Tanah Adat Bumiputera (NCR) Inisiatif Baru, Sekyen 6 Kanun Tanah Negeri nyentuk ke sehari tu.

    Pemesai Opis Tanah Enggau Servei (JTS) Sibu Norlina Ra’ee madah, ari penyampau nya 25 bengkah endur enggau pemesai 63,289 hektar udah digazet.

    “Kelimpah ari nya, 15,909 hektar tanah ba 18 bengkah endur udah digazet sereta disuaka ngagai sida ke beempu tanah,” pia ku iya madah maya Pengerami Nyuaka Gazet Rizab Komunal Bumiputera (Betanam-Betupi) Seksyen 6 Kanun Tanah Nengeri enggau Chek Pampas Tanah ditu, kemari.

    Pengerami nya dipenyadi Sapit Kepala Menteri Datuk Amar Awang Tengah Ali Hasan.
    Bela datai maya tu iya nya Menteri Muda Pelajar enggau Pansik Teknologi Dr Annuar Rapa’ee, Kaban Kunsil Nengeri (ADUN) Ir Christopher Gira Sambang, Sapit Direkter Opis Tanah enggau Servei Abdullah Julaihi enggau Residen Sibu Hii Chang Kee.

    Nangkan pengawa keterubah nyukat kelingi tu, ku Norlina, dua bengkah endur di sitak tu iya nya Sungai Tajam, Batang Oya enggau Tanjung Penasu udah disukat nengah Seksyen 18 Kanun Tanah Nengeri.

    “Naka ke diatu 16 iti surat beempu tanah nengah seksyen tu udah disua ngagai sida ke ngempu tanah lalu 76 iti agi benung diaduka,” ku iya nerang.

    Ba pengawa nya kemari, 82 iti gazet Rizab Komunal Bumiputera Sesyen 6 Kanun Tanah Nengeri disua ngagai sida ke beempu empat bengkah endur ditu enggau pemesai tanah 37,454 hektar.

    Tu mungkur gazet tanah di Igu, Tamin, Selangau enggau pemesai 3,039 hekar, Batu 36, Jalai Oya, Tamin, Selangau (159 hektar), Jalai Sibu-Bintulu, Stapang, Selangau (4,067 hektar) enggau Sekuau, Ulu Oya enggau Sungai Sebindang, Ulu Oya (30,189 hektar).

    Berebak enggau nya chek pampas sepenyampau RM13.6 juta disua ngagai 105 iku penerima sida ke beempu tanah alai ngaga empat bengkah projek.

    Projek tu iya nya ngaga Sekula Primari (SK) enggau Sekula Sekondari (SMK) Permai Sibu enggau penyampau pampas RM10.6 juta, ‘Alternative Site’ SK Dudong, Sibu (RM1.72 juta), Opis Bomba enggau Penyah Penusah di Selangau (RM134,000) sereta Ulu Sungai Merah 33/11KV Substation (RM1.2 juta). #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads