Header Ads

  • Baru Nyadi

    Apai indai patut ngerebut peluang disedia perintah ba pekara pelajar.

    BEKENU: Raban apai indai patut ngerebut peluang pelajar ti disediaka perintah kelebih agi ba semua perengka guna ti udah ngelempungka tating pelajar bala anak sida.

    Kaban Parlimen (MP) Sibuti, Dato Ahmad Lai Bujang madahka perintah udah nyediaka bup teks, disangkung bayar pelajar di sekula, sekularship enggau jali belanja ngagai nembiak ke nampung pelajar ngagai palan pelajar tinggi.

    “Apai indai mega patut mantu bala anak sida ngiri penemu, pekara pemadu muntang dikereja iya nya meransang sereta nentuka bala anak nerima pelajar menyana,” ku iya rambau Program Moh Ngeteh Merdeka KKLW enggau Ngintu Hari Kebangsaan Ke-60 TABIKA KEMAS Parlimen Sibuti Taun 2017 kemari.

    Ahmad Lai madah iya ulih dipejalai di tikas pra-sekula enggau sekula primari iya nya apai indai semina patut begulai enggau bala anak tetiap kali sida ngulang pelajar.

    “Apai indai patut ngelimpangka awak antara dua ngagai tiga jam sehari begulai enggau bala anak ngulang pelajar ngambika bala anak sida seruran berasai diperansang nyapai penyulut,” ku iya nyemetak.

    Berebak enggau nya, iya mega ngelalau apai indai matau pejalai bala anak nyeliahka sida ari tepejuh ngereja ulah enda menuku.

    “Seruran pantau pejalai bala anak dikena ngurangka penyalah rama ti majak ngelekai ngagai menua pesisir baka bejalai nadai tuju, lumba motor, gian dadah sereta ke bukai,” ku iya.

    Ba lansa bukai, Ahmad Lai madah peranak Malaysia patut nemu pemar ditapi bala rayat enggau raban nyaga pengelikun ngulihka kuasa megai perintah diri suba.

    “Semua tu patut dikenang kitai ngambika nyadi tipan jerita ngagai bala anak lebuhka di rumah tauka di TABIKA, ngambika sida nemu pemesai reti merdeka nya,” ku iya nerang.

    Merdeka ti diasaika kitai diatu patut dijaga, ditan sereta diiri ngambika rayat terus mansang dalam semua bidang, idup dalam pemaik sereta pengelantang.

    “Nyema kitai ngelusu, ilap, sereta puntan ngetan sereta ngiri merdeka, menua kitai deka napi pemerinsa, ensekin sereta deka dipegai perintah luar baru.

    “Tu ukai nyenggala di baruh pegai perintah tang ulih nyadi ba pekara bukai baka bepanggai ari sukut ekonomi enggau pengelikun ari menua ti mansang,” ku iya.

    Berindik ari nya, bala anak patut diseridi enggau diterenak ngena pemanah ulah baka bagas gawa, bebasa, bebatak asur, lurus ati enggau talukka menua sereta ke bukai.

    Sama bisi datai Pemesai KEMAS Bagi Menua Miri, Eric Gray Raymond Jos, Penulung Direktor BTN Nengeri Sarawak, Yunus Taib, Menijar Felcra Bagi Menua Miri, Shahriman Salim, enggau Menijar Giat Mara Bekenu, Saadi Idris. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads