Header Ads

  • Baru Nyadi

    Basa enggau pangan diri pelasar penegap PBB.

    SIBU: Seruran nemu bebasaka pangan diri nyadi pelasar penegap Parti Pesaka Bumiputera Bersatu (PBB) lalu nya patut ditan sampai ke ila-ila, ku Sekretari Besai PBB Dato Sri Dr Stephen Rundi Utom.

    Iya ke mega Menteri Utiliti madah kaban sayap Pesaka enggau Bumiputera PBB ngembuan pemereti ati ke chukup tegap nyentuk kurang penyarut tauka laya entara sida.

    “Nyadi semua nya bejalai enggau manah lalu sitak kitai mega dijaga enggau meruan, semina struktur penuduk nya bepelasarka basa, nadai ditulis, tang udah nyadi adat kitai ba PBB.

    “Ba aku, seagi kitai seruran bebasa sereta meretika asai ati pangan diri, aku ngasai sesebengkah parti nya udah chukup tegap.

    “Nya mih nyadi pengering PBN,” ku iya madah ngagai pemberita pengudah bejadika Program ‘Merarau Segulai Sejalai’ diatur PBB Bawang Assan ba Rumah Mary, Sungai Bidut ditu kena Hari Enam tu tadi.

    Bala temuai ke datai nyengkaum tujuh unit PBB ditu iya nya Bawang Assan, Tanjung Penasu, Pasai, Rassau, Bungan, Bukit Besai (pro tem) enggau Sungai Bidut (pro tem).

    Kelimpah nya, Dr Rundi mega ngelalau semua pating PBB ngenegapka agi kerejasama awakka ngetanka pengering parti nya.

    Berebak enggau nya, Tuai Rumah Mary Geruna madah iya berasai chukup gaga ati enggau penatai temuai dipebasa, lebih agi diberi basa nyadi pengatur program nya.

    Nitihku Mary, rumah panjai sida ke bisi 18 pintu didiri maya taun 1938 lalu patut dikemanah baru.
    “Kami ngarap piak perintah ulih mantu kami ngemanahka baru rumah tu laban ke udah chukup tuai.

    “Kelimpah nya, aku mega minta disediaka perengka guna Wifi ditu, laban bala anak kami semua udah pandai nguna internet,” ku iya.

    Bekaul enggau peminta nya, Sapit Menteri Pemansang Menua Pesisir enggau Kandang Menua Datuk Alexander Nanta Linggi madah, opis menteri iya bisi nyendiaka agih belanja nengah ‘Projek Bantuan Rumah’ dikena ngadu baru sereta ngemanah rumah.

    “Nyema opis menteri kami ngemendarka peminta kita, iya deka nyadi RM10,000 ungkup sepintu bilik. Ditu bisi 18 ruang bilik. Nyadi, sida (rumah panjai) deka nerima urung RM180,000 dikena ngemanahka rumah ari opis menteri aku,” ku iya.

    Berebak enggau nya, Dr Rundi bisi ngungkupka RM10,000 ari geran projek mit pemansang menua pesisir ngagai Komiti Pemansang enggau Pengelikun Genturung Pendiau (JKKK) Rumah Mary, udah nya RM20,000 ungkup PBB Bawang Assan.

    Sama bisi datai ex-Sapit Kepala Menteri Datuk Patinggi Tan Sri Alfred Jabu, Kaban Kunsil Nengeri (ADUN) Bukit Goram Jefferson Jamit, ADUN Tamin Christopher Gira, sekretari politik ngagai Kepala Menteri Maurice Joannes Giri, Petrus Igat Mathias, Kaunsilor Tapah Ata, Jenny Bangga, Temenggong Stanley Gramong enggau Romeo Christopher Tegong, ke mega pemangku chairman PBB Bawang Assan enggau chairman PBB Sungai Bidut pro tem Jiram Mardan. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads