Header Ads

  • Baru Nyadi

    Empat buah rumah panjai di Bukit Mabong udah nerima SARES.


    KAPIT: Sekretari Politik Kepala Menteri Sarawak Nicholas Kudi Jantai nyadi saksi ngemata Pengawa Nyuaka Hak Ngempu Sistem Solar Skim Bekal Kuasa Karan Menua Pesisir (SARES) di Pelilih Bukit Mabong ke diatur ba Komplek Nengeri Bletih ditu, kena Hari Dua tu tadi.


    SARES udah mai penguntung ngagai empat buah rumah panjai iya nya Rumah Jana Nanga Gelong Kanan Sungai Sekeroh Oyan, Rumah Linggi Nanga Jelayan Sungai Sekeroh Oyan, Rumah Alan Nanga Gelong Kiba Sungai Sekeroh Oyan enggau Rumah Serani Sungai Sekeroh Oyan.

    SARES ke beungkus RM3.5 juta meri penampak ngagai empat buah rumah panjai ti mungkur 56 pintu bilik enggau 499 iku peranak ke udah bulih penguntung ari skim nya.

    Ba atur pengawa sehari nya, Kudi bisi nyuaka ‘Surat Aku Janji’ ngagai bala tuai rumah ti deka ngintu SARES di rumah panjai sida empu.

    Pemesai ari Sarawak Energy Bhd (SEB), Christopher Wesley Ajan dalam jaku dipansutka iya ngerintaika semua pekara ti ulih enggau enda ulih dikereja maya ngintu penal solar enggau penyikap perengka guna skim alternatif elekterik nya.

    Iya mega bisi meri lumur telefon piak ti patut dikangau nyema bisi kes penanggul alternatif elekterik nyadi. Palan Servis Pelanggan 1300 88 3111 ungkup Miri enggau Kuching, Memarian Jangoh 013 839 5490, McDawsan Dewk 013 894 6464 enggau Carnes Calwyn Duwas 019 589 4498 di Indu Opis Operasyen Menua Pesisir.

    Residen Kapit Joseph Belayong, Pemesai Pelilih Bukit Mabong Douglas Pungga, Pemesai Ngatur Pengawa Kelvin Ligong enggau Grace Anyie, Eksekutif Direktor Operasyen HELIDS PHOTOVOLTAIC Sdn Bhd Niranpal Singh, Menijar Projek HELIDS PHOTOVOLTAIC Sdn Bhd Lieutenant Colonel Liew Swee Ming (pinchin), pemesai ari Opis Menteri Perengka Guna Mensia Mayuh Robert Engkiau, Christopher Wesley Ajan, Sekretari Peribit Kanan Sapit Menteri Sylvester Insor Lingan, Pemesai Pekara Khas Sapit Menteri Ambrose Abong Bugek, Penghulu Jampi Raweng, Penghulu Steward Sawing, Penghulu SallanG Batang sereta bala ke bukai bela bisi datai.

    Sistem Solar ke bisi di nengeri tu iya nya di baruh Strategi Tasik Biru Nasional (NBOS) Opis Menteri Perengka Guna Mensia Mayuh, nengah kerejasama strategik perintah nengeri Sarawak enggau Opis Menteri Pemansang Menua Pesisir enggau Kandang Menua (KKLW) ke alai pemansut belanja 50 peratus ari perintah nengeri sereta 50 peratus agi ari KKLW.

    Program SARES deka terus dipejalai lalu deka mayuh agi rumah panjai di kandang menua ulu deka diberi projek ke sebaka ti mungkur mayuh agi ruang bilik, genturung pendiau tauka rumah panjai di serap menua ulu.

    Kandang menua tu dipilih ti jauh di ulu lalu enti ulih enda lama agi tauka dudi hari sida ulih disambung enggau bekal elekterik grid. Kandang menua tu enda ulih dibai dalam sistem grid meri kuasa ti meruan ngagai sida, nya kebuah perintah deka ngeluarka belanja besai ba Sistem Solar ngambika peranak rumah panjai di menua tu mega ulih ngasaika bekal elekterik 24 jam. -Utusan Borneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads