Geran ke udah diberi perintah patut diterang ngagai kaban gerempung. - Berita Iban Online | Laman Web Berita Kitai

Header Ads

  • Baru Nyadi

    Geran ke udah diberi perintah patut diterang ngagai kaban gerempung.


    KAPIT: Kaban Kunsil Nengeri (ADUN) Bukit Goram, Jefferson Jamit Unyat minta bala ketuai sesebengkah gempung ukai dikuasa perintah (NGO) madah ngagai bala kaban iya pasal geran ti udah diberi perintah ngambika sida nemu pengibuh perintah mantu ngemujurka perambu aktiviti pulaika pemaik ngagai bala kaban sida.


    Ku iya, geran tu disukung bala pengari rayat belalauka surat peminta ungkup sekeda aktiviti.

    Aku bisi rikod semua NGO ke udah diberi geran di baruh sitak tu (Bukit Goram) lalu aku ngenataika iya ngarika perintah ngagai kita.

    Nya alai nyadi orang ti diberi pangku pengawa sereta dikearap ari bala kaban serakup, kita (ketuai) patut nerang ngagai bala kaban pasal geran perintah ti diberi tu,” ku iya lebuh pengawa nyuaka geran ngagai empat NGO, penyampau manggai RM40,500.

    Pengawa tu udah diatur ba sebengkah hotel ditu, bedau lama ke udah.

    Bala penerima geran iya nya Komiti Pemansang Enggau Pengelikun Genturung Pendiau (JKKK) Kampung China Bletih Kapit (RM17,000), Serakup Indu Kwang Tung (RM6,500), JKB Komuniti China Kapit (RM6,000) enggau Serakup Tai San Ten nerima RM11,000. Ku iya, bala ketuai serakup meseti bisi ulah ti manah enggau lurus ngagai perintah enggau rayat.

    Geran aktiviti tu ungkup bala kaban serakup. Nya alai, sebarang aktiviti enggau projek ti udah diberi perinta patut dipadah ngagai bala kaban serakup.

    Pia mega, meseti ngadu ripot baka ni geran tu dibelanja.

    Maya Pengawa Bepilih Besai Ke-14 (PRU14) ti deka datai, Jamit minta rayat terus bediri tegap nyukung chalun Barisan Nasional (BN) di P 215 Kapit.

    “Kaban Parlimen (MP) kitai ke diatu, Datuk Alexander Nanta Linggi ke mega Sapit Menteri Pemansang Menua Pesisir enggau Kandang Menua udah bejalaika pangku pengawa enggau manah ngelama tu.

    “Pemanah pengawa dikereja iya nyata ngayanka pengiruh nangkup peminta rayat, ti ransing ngemansangka kapit.

    “Kenyau ari iya nyadi MP, iya udah bejalaika mayuh projek ditu. Iya nyadi chalun dipilih kitai maya PRU tu ila.

    “Kitai agi begunaka mayuh pemansang, nya alai kitai agi begunaka iya mangku pengawa nyadi ketuai.

    “Sukung tegap ari rayat deka nentuka iya (Nanta) terus nyadi ketuai ngemai mayuh agi pemansang ba penyikap perengka guna enggau infrastruktur,” ku Jamit nerang silik.

    Sama bisi datai Temenggong Tan Kian Hoo, Pemancha Yong Thu Fook, Penghulu Sia Shui Poh, Penghulu Wong Kie Ing, Kapitan Yap Hui Le, Kapitan Kong Cheak He, Chairman SADIA Kpait Edward Manggah, sereta Pemantu Peribit Jamit Cochnam. -Utusan Borneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads