Hari Orang Indu 2017 ke dirami ba BCCK meri kelai basa penyulut ba bidang lumba. - Berita Iban Online | Laman Web Berita Kitai

Header Ads

  • Baru Nyadi

    Hari Orang Indu 2017 ke dirami ba BCCK meri kelai basa penyulut ba bidang lumba.

    MERI PENERANG : Fatimah nerang ngagai Abang Johari bagi gambar orang indu ke nyulut dalam mayuh bengkah bidang.

    KUCHING: Hari Orang Indu 2017 Renggat Nengeri Sarawak, ‘Orang Indu Sarawak Dalam Bidang Lumba enggau Main; Penyulut Sida, Ngemegahka Menua’ ti bisi digulu urung 6,000 iku orang udah mujur diatur enggau chukup pengerichah.

    Pengerami ke diatur ba BCCK nya dipenyadika Kepala Menteri Datuk Amar Abang Johari Tun Openg, ti disempulang bini iya Datin Amar Datuk Juma’ani Tun Tuanku Bujang.

    Entara ke bisi datai ex-Tuai Pemegai Menua Tun Datuk Patinggi Abang Muhammad Salahudddin enggau bini iya Toh Puan Datuk Patinggi Norkiah; Sapit Kepala Menteri Datuk Amar Douglas Uggah Embas enggau bini iya Datin Amar Doreen Mayang; Penyanding Penemu Pemansik Sains Sarawak Datuk Patinggi Tan Sri Alfred Jabu Numpang enggau bini iya Tan Sri Dato Sri Empiang Jabu sereta ke bukai.

    Hari orang indu ti dirami tiap taun dikena meri basa sereta ngingatka pengawa ke udah digaga orang indu dalam mayuh bidang enggau penatai ngagai pemansang enggau pengelantang nengeri Sarawak.

    Taun tu, tuju besai pengerami dikena perintah meri kelai terima kasih ngagai pengawa ke udah digaga raban orang indu dalam bidang lumba enggau main   ke udah ngangkatka nama Sarawak di mata dunya.

    Setipak enggau rambai jaku hari orang indu 2017, sejarah atlet orang indu Sarawak udah dibantai sereta dipekunsika enggau orang mayuh lebih agi raban biak, dalam bup ke udah diasil sereta dichelak iya nya ‘Sarawak Women in Sports: Their Achievements, Nation’s Pride’.

    Bup nya ngenang sejarah 43 iku atlet nengeri Sarawak kenyau ari taun 1950an nyentuk ke diatu.

    Nengah bup nya, dikearapka ulih nyadi lalau sereta meri peransang lebih agi ngagai atlet biak sereta raban bansa Sarawak.

    Kelimpah ari nya, atur pengerami kepenudi maya pengerami hari orang indu mega iya nya meri gelar ngagai tukuh orang indu sreta gerempung indu Sarawak, ti mega entara objektif pengerami tu diatur.

    Abang Johari diberi basa nyuaka perais ngagai Anugerah Datuk Patinggi Laila iya nya gelar pemadu tinggi diberi ngagai Toh Puan Datuk Patinggi Norkiah; Anugerah Kepala Menteri Bidang Ketuai Orang Indu (Christine Wee Yian Phing); Anugerah Kepala Menteri Bidang Pengemeran Aktiviti Rama Orang Indu (Dora Abdul Rahman);

    Anugerah Kepala Menteri bidang Pengawa Dagang Orang Indu (Audry Wan Ulok); Anugerah Kepala Menteri Bidang Penyukut  Khas Dalam Bidang Lumba (Tania Hamid Bugo) enggau Anugerah Gerempung Orang Indu Nyulut (Gerempung Pengintu Pengelantang Pendiau Islam Malaysia (PERKIM) Pampang Sarawak).

    Ba pengerami, bini ex-TYT Toh Puan Datuk Patinggi Norkiah lebuh dikerandau pengarang berita, iya sempat bekunsi pengaga tang enda nyangka diri diberi gelar ti chukup besai reti nya.

    Iya ti nerima gelar nya berindik ari ti regas dalam program enggau aktiviti ba rumah kebajikan anak mit, orang tuai enggau organisasyen pengelantang enggau pengasih ke bukai ti enda ngira bansa enggau jalai pengarap.

    Iya mega regas dalam pengawa volunteer enggau ejensi perintah sereta gerempung ukai dikuasa perintah menua tu.

    Toh Puan Norkiah nyadi Penyanding Penemu  Institut Besai Orang Indu Sarawak (SFWI) ari 2001-2013, Gerempung Pandu Puteri Sarawak (2001-2013) enggau Guild Trefoil Girl Guide (GGTG) Pampang Sarawak (2001-2013).

    Nambahka nya iya penyanding penemu Kaunsil Pengintu Pengelantang enggau Lumba Staf Perintah (MAKSAK) (2001-2013), Gerempung Apai Indai enggau Pengajar Sekula Seni Malaysia Sarawak (2013 nyentuk diatu) sereta sekeda ejensi di baruh Opis Pengintu Pengelantang Pendiau Raban Bansa (JKM) Sarawak.

    “Aku amat gaga ati nerima gelar ti chukup besai tu laban aku endang enda nyangka deka diberi gelar tu.

     “Taja pia, aku amat beterima kasih ngagai semua piak ti meri gelar ke chukup besai reti tu,” ku iya ti mai pulai  trofi kristal, setipikit, bungai enggau mata duit RM5,000.

    Penerima Anugerah Kepala Menteri Bidang Penyulut Khas  Dalam Bidang Lumba, Tania Hamid Bugo, ti kala nyadi atlet nyemerai menua mega temegah ati laban sejarah lumba enggau main ti urung 90-an dikeingat sereta dikenang.

    Iya ti bisi ngembuan  Sarjana Muda Ekonomi ari New Zealand enggau Sarjana Muda Pendidikan Awal Kanak-kanak ari Singapura, pengempu Tadika enggau Taska Sri Keria tu kala megai rikod 13 midul emas maya Lumba Malaysia (SUKMA) III sereta mujur nempa 12 rikod baru berengkah ari umur 14 taun sereta diangkat nyadi atlet indu ti pemadu nyulut ba taun 1990.

    “Aku ngarapka nama utai ke diterima aku sehari tu ulih nyadi peransang ngagai raban biak di luar din lebih agi orang indu ngambika terus bebendar, ngempung sereta nembu nyentukka pengujung enggau ngereja naka pemanah.

    “Enda ngira nama pekara ti dikeraja, nadai kebuah enda ulih nempa penyulut. Taja pia deka mujur tauka nyulut ukai pekara ti senang, tang enti aku ulih, orang indu bukai mega ulih,” ku Tania lebuh dikerandau pengarang berita.

    Nyerumba hari orang indu 2017 bisi 70 buah bansal pemandang enggau bejual bisi disediaka, kelimpah ari bisi aktiviti bukai udah diatur baka beatbox, tanda flashmob, street fight, silat enggau pekit karaoke.

    Dikeranjai Pengenyan Labang @ Utusan Borneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads