Jasa Adenan meruan dikeingat, kemari iya diberi pangkat SBS. - Berita Iban Online | Laman Web Berita Kitai

Header Ads

  • Baru Nyadi

    Jasa Adenan meruan dikeingat, kemari iya diberi pangkat SBS.

    KE PENGINGAT: Tun Taib (dua kiba) sereta bini, Toh Puan Datuk Patinggi Raghad Kurdi (tiga kiba) begambar enggau penerima tanda pangkat Panglima Gemilang Bintang Kenyalang (PGBK) ke mai gelar Datuk Snowdan Lawan (kiba). Bela dipeda bini Snowdan, Melinda Claudia Bucking (kanan).

    KUCHING: Niang Kepala Menteri (ke dulu) Datuk Patinggi Tan Sri Adenan Satem diberi tanda pangkat Satria Bintang Sarawak (SBS) ti mai gelar Pehin Sri nyerumba pengerami Hari Pengada Tuai Pemegai Menua (TYT) Tun Pehin Sri Abdul Taib Mahmud Ke-81 kemari.

    Adenan ke midang kena 11 Januari tu tadi ketegal komplikasyen jantung nyadi Kepala Menteri Sarawak Ke-5 berengkah 1 Mac 2014.

    Iya dikeingat ketegal ti suah bejaku deka ngenegap kuasa atonomi Sarawak sereta ngenuku 53 inisiatif dalam timpuh dua taun nyengkaum ngangkatka English nyadi bahasa lumur dua rasmi di Sarawak.

    Niang Adenan mega udah ngulu Barisan Nasional (BN) Sarawak menang besai ba Pengawa Bepilih Nengeri 2016 ke alai BN menang 72 ari semua 82 iti penuduk.

    Kelimpah ari Niang Adenan, TYT ke dulu iya nya Tun Datuk Patinggi Abang Muhammand Salahuddin mega nerima SBS ke bela mai gelar Pehin Sri.

    Peranak asal Sibu ke beumur 96 taun nya kala dichiri nyadi Gabenor ba taun 1977 nyentuk ngagai 1981 sereta dichiri baru nyadi Gabenor ba taun 2001 nyentuk ngagai 2014.

    Ba pengawa ke sama, Kepala Menteri Datuk Amar Abang Johari Tun Openg diberi tanda pangkat Datuk Patinggi Bintang Kenyalang (DP) ke mai gelar Datuk Patinggi.

    Abang Johari dichiri nyadi Kepala Menteri Sarawak Ke-6 kena 13 Januari taun tu, dua hari pengudah pemidang Adenan.

    Empat iku nerima tanda pangkat Panglima Negara Bintang Sarawak (PNBS) ke mai gelar Dato Sri.
    Sida empat iya nya Menteri Penguasa Pemayuh Pengereja Pengawa Datuk Seri Richard Riot, Menteri Orang Indu, Ruang Bilik enggau Pemansang Komuniti Datuk Seri Rohani Karim, Menteri Pengintu Pengelantang, Komuniti, Orang Indu, Ruang Bilik enggau Nembiak Mit Datuk Fatimah Abdullah enggau Luya Nengeri Datuk JC Fong.

    Menteri Muda Nembiak enggau Lumba Snowdan Lawan nguluka lima penerima bukai nerima tanda pangkat Panglima Gemilang Bintang Kenyalang (PGBK) ke mai gelar Datuk. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads