Header Ads

  • Baru Nyadi

    Ketuai komuniti meseti chakah mantu ngemansang nembiak redak.

    KOMITED BEJALAIKA TANGGUNGPENGAWA: Awang Yusup (tengah) lebuh ti ngulu aum komiti di Opis Pelilih Sibu bedau lama.

    SIBU: Semua ketuai komuniti nyengkaum tuai rumah diansak chakah bejalaika tanggungpengawa kelebih agi ungkup nembiak redak ari baruh pegai sida ke begunaka bantu.

    Pemesai Pelilih Sibu Awang Yusup Awang Mostapha madah, tetiap ketuai komuniti patut seruran ngemeratka peranak di genturung pendiau dipegai sida ti randaka pemansang nengah ngaga peminta sentang bantu ti engkeman.

    “Anang nganti pekara tu udah dikunsi ba media rama lebuh kami ti deka bejalaika pengawa ke bekaul tauka deka meri bantu,” ku iya lebuh bejaku ba baum komiti kort bansa asal Opis Pelilih Sibu ke digaga bepalan di opis nya bedau lama.

    Ku Awang Yusup madah, ketuai komuniti kelebih agi tuai rumah patut nyaup nembiak redak sida ke begunaka bantu baka ari sukut pengelantang pendiau nengah chara nganjung pom tauka ngaga peminta ngagai opis pelilih sereta opis pengintu pengelantang pendiau.

    Kelimpah ari nya, iya mega nyemetak mesan ngambika semua ketuai enggau nembiak redak patut bejejaga lebuh ti nyain sebarang dokumen tauka nyadi saksi dikena nyeliahka mayuh penanggul nyadi.

    Awang Yusup mega ngarapka bala ketuai komuniti ulih bejalaika tanggungpengawa ke udah dilempai enggau ngemeranka integriti sereta lurus ngagai komuniti.

    Ku iya nambah, pekara tu berat dikena nentuka pemujur atur pengawa ke diatur Komiti Pemansang enggau Pengelikun Genturung Pendiau (JKKK) ti mega patut bisi piak ti ngemata tauka ngaga dokumen sukung ti endur nyimpan semua pejalai agih belanja ke udah diungkup ngagai JKKK.

    “Ripot belanja mega patut dipejurai dalam tetiap kita ngatur baum,” ku iya seraya ngelalau ketuai komuniti ngambika nganjung ripot baum JKKK ke patut digaga tetiap tiga bulan.

    Bejaku sentang pekara bekaul enggau kort asal, iya mesan pemesai ti ngetuai sereta pemerati deka diembing nengah atur dalam genteran Native Customs 1993.

    Ba kenang ke bukai, chairman komiti Kort Bansa Asal Opis Pelilih Sibu Pemancha James Semilan madah, aum nya dikena bejuraika penanggul ke ditapi ketuai komuniti sereta tuai rumah.

    Kelimpah ari nya, ku iya, aum tu mega dikena nambah sereta ngenegapka penemu entara semua kaban komiti ngambika mereti atur sereta undang-undang kort tu ke bekaul enggau pekara bansa asal.

    “Aum tu mega nyadi sebengkah chara dikena nyungkak kualiti kaban ngambika sida ulih nyadi profesional dalam tanggungpengawa kelimpah ngenegutka kaul enggau kerejasama entara sida,” ku James.

    Kort Bansa Asal Opis Pelilih Sibu bisi 24 iku komiti ke entara nya ketuai komuniti enggau tuai rumah.

    Entara ke bisi datai rambau aum nya penyanding penemu komiti Temenggong Stanley Gramong, mandal presiden Penghulu Philip Kayak, sekretari Catherine Nain, sapit sekretari Penghulu Richard Ampi, tukang wang Penghulu Jeffery Sut enggau sapit tukang wang TR Anggup Ngelembai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads