Header Ads

  • Baru Nyadi

    KSDS ngatur Program Pemandang enggau Nebah Sape kena 23 September.

    ARAM DATAI SAMPAL: Anthony (tengah) maya aum media ditu, kilah ensana. Bela ayan Robin (kanan) enggau Nicholas.

    SIBU: Gerempung Sape Dayak Sibu (KSDS) deka ngatur Program Pemandang enggau Nebah Sape 2017 kena 23 September tu ba Pusat Warisan Sibu ditu.

    Chairman KSDS tu Anthony Abong madah, program ti keterubah nya diatur ba sitak tengah tu deka belabuh ari pukul 10 pagi nyentuk 7 lemai.

    “Maya tu ila, mensia mayuh ke bisi datai deka meda sape, chara ngaga sape, nebah sape enggau program pemandang ubah tukuh sape.

    “Kelimpah ari nya, mensia mayuh mega tau begambar ngena ngepan Dayak, bebelika asil pengelandik jari enggau mendingka penerang bekaul enggau sape sereta program nebah sape ari KSDS,” pia ku iya maya aum media ditu, kilah ensana.

    Bela datai maya tu iya nya Sapit Chairman KSDS Robin Albert Bennet enggau komiti KSDS Nicholas Albert Bennet.

    Nambahka jaku iya, Anthony madah, rambai jaku ke dikena maya program tu iya nya ‘ With Sape, We Unite’.

    “Jaku tu dipilih laban sape ditebah orang ari serata dunya baka Uyau Morris ari Indonesia, Tabunesia (Indonesia), Arai (Jepun), Abisheg (India), Julian Cottet (Spanyol) kelimpah sida ke bukai ari menua tu empu ti udah tebilang baka Jerry Kamit, Saufi, Eugene, Jimpau, Anderson Kalang sereta mayuh agi.

    “Semua sida tu endang ngelala pangan diri ketegal ari nebah sape,” ku iya nerang.

    Kelimpah ari nya, iya mega madah, gerempung sida bela bisi ngangau ke orang ti bepengelandik ke bukai nebah sape maya tu ila.

    Berebak enggau tu Anthony madahka program sida nya diatur beserimbai enggau Taun Nemuai Ke Sibu 2017, Sibu Base Jump 2017 enggau Hari Malaysia.

    Iya madah, program nya bela disaup Borneo Events Entertainment, Lembaga Pelancongan Sarawak (STB), Opis Kaunsil Sibu (SMC) enggau Pusat Warisan Sibu.

    Berindik ari nya, iya nesau mensia mayuh ulih datai sampal meda program ke diatur nya ila.

    “Gerempung kami mega ngelaluka mensia mayuh ti deka nyadi raban KSDS tau ngerijister nama maya tu,” pia ku iya sambil madah mensia mayuh nadai dipinta bebayar datai ngelawa program sida nya #UtusanBorneo.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads