Kuing nengeri tu ditentu peranak Sarawak empu.
Cari Berita

Advertisement

Kuing nengeri tu ditentu peranak Sarawak empu.

Chief Editor | Berita Iban MY
September 25, 2017

BEJADI: Abang Johari (dua kanan) ngemujur pengawa nasih tanah ungkup projek komplek Opis Majlis Daerah Bau ke baru. Bela dipeda Manyin (kanan).

BAU: Kuing enggau nasit Nengeri Sarawak semina ulih ditentuka peranak Sarawak, Ku Kepala Menteri Datuk Patinggi Abang Johari Tun Openg.

Ketegal nya ku iya, Niang Tok Nan (Adenan) minta hak Sarawak ke disetuju dalam Sempekat Malaysia 1963 (MA63) dipulai ngagai Sarawak.

“Aku deka ngemujurka pinta nya, semina hak ke di setuju ba MA63 nya lalu nadai lebih nadai kurang.

“Aku madah ngagai Menteri Besai, ‘Sir’ apai nuan nyain sempekat Malaysia ba taun 1963 di London.

Ungkup Sarawak, apai aku nyain sempekat nya ngarika Sarawak.

“Kitai ke nyadi anak patut masa, nitihka sempekat nya,” ku iya.

Abang Johari mansutka jaku nya ba Pengerami Ngintu Genap 60 Taun Majlis Daerah Bau sereta Pengerami Nasih Tanah ungkup Kompleks Opis Baru MDB ditu, kemari.

Ngenang sentang pinta dipulaika hak nya, Abang Johari madah Menteri Besai Datuk Seri Najib Tun Razak patut dipuji.

“Iya (Najib) madah Abang Johari, ‘aram mih kitai berandau’.

Ari maya Tok Nan lalu diatu maya aku, pinta nya dikerandau sechara rasional.

“Kitai deka ka pinta nya dikerandau nengah Sempekat Malaysia sereta konstitusyen Malaysia,” ku Abang Johari seraya madah tu mih chara kitai sereta enda sengapa.

Abang Johari nambah nya mih kebuah iya nganjung seiti tim ke London ngambika ulih ngaga pansik ba sentang MA63.

Ku iya asil pansik nya bedau ulih dibantai maya diatu tajapan diansak sekeda raban penyakal.

“Asil pansik nya deka dibantai ba maya ke ngena ketegal bisi sekeda pekara ke udah ditemu,” tandu Abang Johari.

Ba pengawa kemari, Abang Johari bisi mega bejadi Pesta Tasik Biru ke diatur tiga hari berunggu berengkah 22 nyentuk ngagai 24 Sept 2017.

Bela datai Menteri Pekara Pelajar, sains enggau pansik Teknologi Dato Sri Michael Manyin, Menteri Muda Opis Kunsil Kandang Menua Dato Penguang Manggil, Sapit Menteri Betanam Betupi Dato Anthony Nogeh, ADUN Tasik Biru Dato Henry Harry enggau orang bukai. #UtusanBorneo