KWSP meseti nitih SOP sebedau beranakka puku ba menua luar. - Berita Iban Online | Laman Web Berita Kitai

Header Ads

  • Baru Nyadi

    KWSP meseti nitih SOP sebedau beranakka puku ba menua luar.

    ALOR SETAR: Opis Wang Turu Pengereja Pengawa (KWSP) patut nitihka atur operasyen standard (SOP) ke terit sebedau dikemendar beranakka pulu ba menua luar berindik ari status iya nyadi opis dikearap megai belanja pinchin ke pemadu tuai ba menua tu,” ku Sapit Menteri Wang Datuk Othman Aziz.

    Iya madah, KWSP ngembuan tanggungpengawa nentuka genap puku ke udah digaga setipak enggau pelin dagang lalu pengujung iya meri penguntung ngagai kaban nengah bayar dividen.

    “KWSP enggau Khazanah Nasional Bhd udah lama beranakka puku ba menua luar, ukai semina ba Amerika Syarikat aja laban nya endang sebagi ari strategi korporat sida dikena nentuka portfolio puku ke diperanak sebaka,” ku iya pengudah ngabas sebengkah projek Tekat Bah di Kampung Kelonchor ditu kemari.

    Iya madah munyi nya ngagai pemberita lebuh dipinta meri timbal bekaul enggau pejah penyakal sentang pengawa beranakka puku Khazanah Nasional enggau KWSP ba Amerika Syarikat apin lama ke udah.

    Menteri Besai Datuk Seri Najib Tun Razak maya nemuai seraya gawa ke Amerika Syarikat apin lama ke udah bisi madah pasal perambu KWSP enggau Khazanah Nasional nambahka agi pengawa beranakka puku sida ba menua nya lalu pemutus Malaysia Airlines Bhd deka meli 16 buah bilun Boeing enda lama agi.

    Naka tu, KWSP udah beranakka puku semak US$7 bilion ari sukut ekuiti ba Amerika Syarikat, udah nya Khazanah Nasional, ke ngembuan opis ba Silicon Valley, California, udah beranakka puku urung US$400 juta dalam serikat teknologi tinggi.

    Othman madah, kededua ejensi nya patut pintar ngiga bansa pengawa ke ulih berankka puku nyengkaum beranakka puku ba menua tu empu, ASEAN enggau entarabansa ke ukai semina mungkur pengawa meli saham tang mega nengah pengawa nyereta projek besai enggau meli bon.

    Berindik ari nya, iya madah jaku tuduh sekeda piak ngumbai penemuai seraya gawa Najib ke Amerika Syarikat sebedau tu nyadi sebagi ari pengawa dikena mantu menua nya, nya utai ke enda betul.

    “Kitai sapa deka mantu Amerika Syarikat, enda patut deka mantu ngena RM100 bilion laban ekonomi Amerika udah manggai trilion (dollar)...ama utai ke beguna iya nya kitai nguna peluang beranakka puku awakka ulih meri pulai penyampau ke nguntung.

    “Nitih pupu raban, ambika banding enti untung dalam menua (KWSP) manggai tiga ngagai empat peratus, udah nya ditambah enggau untung ari menua luar ke manggai 11 peratus...penyampau tu mih ke deka diberi pulai baru ngagai kaban (KWSP) nengah bayar dividen ninting taun,” ku iya.

    Dipinta meri timbal pasal jaku tuduh sekeda piak ngumbai penemuai Najib ke Amerika laban nurutka pansik Opis Undang-Undang Amerika Syarikat (DOJ) pasal 1Malaysia Development Berhad, Othman madah nya endang sebagi ari peragam ke sengaja ditempa piak ke ‘jilis’ bekaul enggau pengawa betemu entara Najib enggau Presiden Amerika Syarikat Donald Trump.

    “Suda sida madah Najib takut nyingkangka kaki ngagai Amerika Syarikat laban nangi enda ulih pulai baru (ke Malaysia). Diatu maya iya (Najib) bisi dikangau Presiden Donald Trump empu, sida jilis ga,” ku iya.

    Iya madah dini ulih Malaysia enggau Amerika Syarikat diserara ari sukut kaul dagang, beranakka puku enggau ekonomi laban kededua menua udah nyadi bakih ke chukup tegap kenyau bepuluh taun ke udah.

    Laban nyadi perintah ke megai tanggungpengawa, Othman madah Malaysia deka nguji enggau naka ulih matak mayuh pemeranak puku ari menua luar ngerembaika pengawa beranakka puku ari menua luar ke pemaik menua enggau rayat. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads