Mensia mayuh patut meri sukung ngagai program KOSPEN GS1M. - Berita Iban Online | Laman Web Berita Kitai

Header Ads

  • Baru Nyadi

    Mensia mayuh patut meri sukung ngagai program KOSPEN GS1M.

    KUCHING: Mensia mayuh kelebih agi peranak menua pesisir patut ngambi peluang beperesa pengerai nengah program Komuniti Sihat Pembina Negara (KOSPEN) ke dipejalaika raban volunteer Gerak Sihat 1Malaysia (GS1M).

    Kaban Kunsil Nengeri (ADUN) Sadong Jaya, Aidel Lariwoo madahka program nya deka ngemuntangka peranak menua pesisir ke deka beperesa pengerai laban raban volunteer GS1M KOSPEN iya nya peranak genturung pendiu nya empu ke udah nerima latih.

    “Raban bansa kelebih agi ti diau di kandang menua pesisir patut ngena enggau manah program KOSPEN ke diatur Opis Menteri Pengerai ti enggau tuju dikena betapi enggau penyakit kelebih agi penyakit enda berampit.

    “Kebuah pia, lebuh bisi program tu, sida (peranak di menua pesisir) enda ibuh pulai mansang ke klinik tauka sepital, laban pengawa meresa dulu pengerai nya dipejalai raban volunteer GS1M KOSPEN ti dilatih, ke diambi ari peranak genturung pendiau dia empu.

    “Pengawa beperesa pengerai ke dulu dipejalaika GS1M dipelabaka ulih mantu nentuka tikas pengerai sida ke beperesa, sekalika bisi risiko tauka enda. Nyema bisi risiko tinggi, enti bisi pematut dia peranak genturung pendiau nya diasuh beperesa enggau silik ke sepital,” ku iya.

    Aidel mansutka pekara nya lebuh bejadika ‘Majlis Konvensyen KOSPEN’, ‘Minggu Penyusuan Susu Ibu’ enggau ‘Kem Nak Sihat’ renggat Bagi Menua Samarahan, ba sebuah palan bebeli barang di Kota Smarahan apin lama.

    “Nya alai aram mih kitai nguna enggau manah peluang enggau penumbuh raban volunteer tu dalam pengawa ngangkatka tikas pengerai raban bansa.

    “Tu mega seiti ari chara tumu kitai nyaga pengerai enggau ngemeranka gaya idup bepengerai sereta dikena ngenukuka Malaysia enda agi nyadi menua ke ngembuan peratus peranak besai tuai ti pemadu tinggi bisi obesiti, diabetes enggau hipertensi di Asia Tenggara,” ku iya.

    Berebak enggau tu, lebuh ke ngenang pasal program Kem Nak sihat iya madahka program nya deka terus dipejalaika laban juluk perintah deka mantu rayat Malaysia bulih pengerai ti lebih manah.

    Iya arap bendar program nya mega udah mujur ngempitka kaul entara piak Opis Pengerai enggau mensia mayuh sereta ejensi perintah.

    Kelimpah ari nya lebuh ke ngenang pasal ‘Minggu Penyusuan Susu Ibu Sedunia’, iya madahka tuju atur pengerami nya dikena ngangkatka penyedar raban bansa pasal isu bekaul meri anak ai tusu indai.

    Ku iya, tanggungpengawa ngelakuka pemesai guna ai tusu indai ngagai anak ukai semina tanggungpengawa opis menteri tang begunaka sukung tetiap iku orang nyengkaum lelaki tauka laki enggau organisasyen.

    “Aku temegah ati laban Opis Pengerai Bagi Menua Samarahan mujur nempa kerejasam enggau kompleks bebeli barang dalam atur pengawa nempa kandang ngelinggi ti kondusif iya nya nyendiaka bilik endur indai nusuka anak.

    “Aku ngarapka nengah pengawa nyendiaka bilik endur indai nusuka anak tu deka meri pengelantang ngagai bala indai maya bisi bebeli barang ngagai kompleks tu,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads