Pengerami ngintu Hari Kebangsaan 2017 nadai diasai di Mengeri Kuching. - Berita Iban Online | Laman Web Berita Kitai

Header Ads

  • Baru Nyadi

    Pengerami ngintu Hari Kebangsaan 2017 nadai diasai di Mengeri Kuching.

    KUCHING: Beserimbai enggau Hari Kebangsaan 2017 renggat Nengeri Sarawak ti disambut di Bintulu,pengerami nya bela digulu Tuai Megai Menua (TYT) Tun Pehin Sri Abdul Taib Mahmud enggau bini iya, Kepala Menteri Datuk Amar Abang Johari Tun Openg enggau bini iya, Datin Amar Dato Juma’ani Tunku Bujang enggau sekeda ketuai ke bukai.



    Taja pia, di Mengeri Kuching pengerami ngintu Hari Kebangsaan 2017 enda balat diasai bala mayuh engka ketegal nya siti ari hari kemisi baka hari bukai.

    Menira Malaysia pan nadai mayuh dipeda ditambaika, baik nya opis tauka ejensi perintah, opis korporat nyengkaum di serata Mengeri Kuching, engka ketegal pengerami nya ukai disambut ditu.

    Taja pia, ngena awak nya mensia mayuh ngambi peluang bebelika barang sereta belepa enggau diri sebilik.

    Ba Beatrice Jane anak Ipot,18, seiku nembiak ari SMK Asajaya ke benung belajar ba Form Enam baru ke bisi nemuai ke Mengeri Kuching enggau bala pangan iya, ketegal ngumbai Mengeri Kuching richah nyambut Hari Kebangsaan madah, bisi bida entara Hari kebangsaan enggau Hari Malaysia (ke disambut kena 16 September). Tu haribulan ke endar Sabah enggau Sarawak sama enggau ngempung Malaysia, ba aku Hari Malaysia besai agi reti agi.

    “Taja pia, aku berasai temegah ati laban bisi Hari Kebangsaan, enti nadai Hari Kebangsaan kitai di Sabah enggau Sarawak engka enda begempung enggau Tanah Malaya, kitai pan ulih ngelengkaka diri ari pegai kuasa menua luar,” ku Beatrice seraya madahka sejarah ke baka tu nadai diajar di sekula tang penemu nya diulih diri empu pengudah beratika pengawa ke nyadi ngelingi nyengkaum maya pengajar ngajar ke ngelansa pekara tu.

    Ba Subin anak Eingkal, 66, asal ari Serian, seiku orang ke udah pinchin nyadi soldadu lebuh mai sida sebilik bejalai di India Street, ngasaika kededua haribulan 31 Ogos enggau 16 September (Hari Malaysia) patut sama disambut sereta dikerami.

    “Kededua haribulan nya patut disambut sereta dikeramika, laban baka Hari Malaysia nya ngelaika kitai udah ‘masuk’ Malaysia lalu mandangka kitai udah mujur. Nya alai, kededua haribulan nya beguna amat ba kitai lalu kitai patut berasai temegah ati nyadi rayat Malaysia,” ku iya.

    Siti Azmina Mustapha, 20, gawa ba sebuah kedai di India Street madahka Hari Kebangsaan nya sama besai reti enggau Hari Malaysia.

    “Laban nengah hari ke besejarah tu, kitai beratika mayuh macham pupu bansa kelebih agi di Sarawak ulih idup begulai enggau likun, enggau pangan diri. Taja pia ba penemu aku, nembiak rebak baru diatu patut diberi mayuh agi penemu pasal hari besai tu.

    “Enti diperatika, mayuh bala nembiak kitai bedau terang endar pasal Hari Kebangsaan, Hari Malaysia enggau Hari Kemerdekaan Sarawak, laban tetiap hari besai tu endang bisi sejarah kediri empu,” ku iya.

    Dikeranjai: Utusan Borneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads