Header Ads

  • Baru Nyadi

    Penuduk Lanang, Sibu lubah mansang sekumbang BN alah.

    SIBU: Ketuai Nembiak Parti Sa’ati Rayat Sarawak (SUPP) Pampang Bukit Assek Kaunsilor Joseph Chieng madah, pelilih Sibu kala nyadi sebuah mengeri kedua pemadu besai ba nengeri tu.

    Tang, ku iya pemansang Sibu chukup lubah sekumbang Barisan Nasional (BN) alah ke kededua penuduk Parlimen Landang enggau Sibu ba Pengawa Bepilih Besai Ke-13 (PRU13).

    Tu ku iya, ubah politik ti ngujungka Sibu tinggal nyentuk ulih digelih mengeri bukai.

    “Ba penemu aku pelilih Sibu begunaka sebengkah langgur transformasten ba sukut pemansang timpuh pandak, jelan pengelama enggau timpuh pengelama,” ku iya nengah sebengkah penerang media ditu, kemari.

    Ngelansa pasal langgur transformasyen timpuh pandak ke begunaka awak lima taun dikena ngubah landskap pelilih Sibu, ku iya, nama utai ke beguna iya nga ngemanahka agi insfrastruktur ba sitak mengeri enggau menua pesisir di Sibu.

    “Tu nyengkaum penanggul bah, jalai alun, parit enggau ke bukai ti patut diperunding.

    “Dikena nyeliahka penanggul nya, pengawa ke patut meseti digaga lengkas,” ku iya.

    Iya madah, pengawa nangkir jalai alun, atur penyikap penuh, ngaduka pejalai trafik, penanggul trafik enggau pekara bukai.

    Nitihku iya, atur pengawa ngaduka baru sitak Bukit Assek meri pangka pemansang ngagai pelilih tu.

    Chieng madah, sitak tu ngembuan mayuh penanggul rumah singit enggau parit ke udah penuh sereta penanggul bukai ti ngirauka ati mensia mayuh.

    “Ambika banding insiden rumah merekah ba Jalai Laici enggau Jalai Kapor (Lorong 4).

    “Aku nemu langgur pemansang semua sitak Bukit Assek endang sebengkah langgur ke besai lalu enda muntang digaga.

    “Taja pia, langgur tu endang sebengkah ari juluk ke manah lalu patut digaga enggau lengkas,” ku iya ke mega chalun bepenau SUPP ungkup sitak Parlimen Lanang maya PRU14 ila.

    Kelimpah nya, ku iya ngemayuhka pejalai penerebai bilun ngagai peliih Sibu sereta nurunka rega tikit bilun ngagai Sibu endang sebengkah ari kebuah ngujungka pengangkat mengeri tu.

    Iya madah, tikit penerebai ari Sibu ke mengeri bukai kelalu mar sereta jam pejalai kelalu mimit.

    “Sibu begunaka jam pejalai ke suah ngelawa Kuching, Kuala Lumpur enggau Kota Kinabalu.

    “Pekara tu lebih agi jam pejalai pulai mansang entara Sibu enggau Kota Kinabalu patut dibuka ngagai serikat penerebai ke bukai,” ku iya.

    Berebak enggau nya, Chieng madah peminta ngemanahka insfrastruktur ba Sepital Sibu enggau poliklinik mega beguna ke pemansang Sibu.

    “Sepital Sibu digaga 20 taun ke udah. Tebal agi infrastruktur nyau udah luya. Dikena napi peminta guna perubat enggau meri pengelantang ngagai bala pesakit, projek ngemanahka Sepitak Sibu enggau poliklinik beguna amat.

    “Berebak enggau nya, penanggul enda chukup palan paking kerita ba Sepital Sibu endang udah lama dipadah. Nya alai, aku merambu ngambika pengawa ngaga begunan endur paking beringkat patut digaga ditu,” ku tandu iya.

    Sebengkah agi pekara ke patut digaga, nitihku Chieng iya nya numbuhka palan latih enggau peluang gawa ngagai raban orang indu, indai tunggal, raban orang seranta, nembiak dikena mantu sida nambahka penatai pemisi.

    “Nengah langgur transformasyen sukut pemansang Sibu timpuh tengan enggau panjai, kitai meseti besambungka sitak pelilih Sibu enggau manah ke pemaik ekonomi enggau industri mit ditu ulih dikerembai.

    “:Kitai deka ngamatkanya asal kitai besaup enggau bekerejasama sepanjai maya,” ku tandu iya. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads