Perintah deka nambahka bantu skolarsip seraris pemansang. - Berita Iban Online | Laman Web Berita Kitai

Header Ads

  • Baru Nyadi

    Perintah deka nambahka bantu skolarsip seraris pemansang.

    BINTULU: Perintah nengeri deka neruska pengawa nambahka bantu ungkup anak Sarawak nengah skolarsip awakka ulih nyerungkai bidang penemu ke seraris enggau pemansang nengeri tu.

    Kepala Menteri Datuk Patinggi Abang Johari Tun Abang Openg madah, pengawa tu mega endang sebengkah ari ‘hijrah’ besai reti ke ditagih dalam Islam iya nya nyerungkai semua penemu nyentuk ngagai tikas pemadu tinggi.

    “Tu mih utai ke ditagih kitai lalu beserimbai enggau nyambut Maal Hijrah tu, kitai deka begulai ngerapitka singkang, beserakup enggau meri semua bantu sereta semangat ngagai raban Islam enggau ukai Islam bejalai ngagai tikas ke lebih tinggi,” ku iya.

    Iya madah munyi nya rambau pengerami ngintu enggau Gempuru Maal Hijrah 1439H Renggat Nengeri Sarawak dipenyadika Tuai Pemegai Menua (TYT) Sarawak Tun Pehin Sri Abdul Taib Mahmud ba Dewan Suarah Bintulu kemari.

    Abang Johari madah, hijrah tu minta kitai neruska pengawa ngerembaika pengarap nengah mai pemansang, pengelantang ngagai mensia lebih agi mantu orang tusah.

    Ku iya, Maal Hijrah mega minta kitai nuju ubah ke lebih manah mai pemansang ngagai nengeri Sarawak.

    “Kitai beterima kasih laban nengeri kitai ulih nayup ngemansangka pengidup mensia,” ku iya seraya madah rambai jaku Penyerakup Ummah.

    Pengelantang Menua mega ngemansangka komuniti Islam enggau bansa bukai reti nya hijrah nuju pengjdup dudi hari ke lebih manah.

    Abang Johari mega nyebut chunto pemansang Kota Madinah dibaruh pegai perintah Islam tang tetap ngintu pemaik orang ukai Islam.

    Ku iya, Sempekat Madinah nyadi pelasar pemansang ngagai rayat mayuh nyentuk dikerembai ngagai menua Eropah sereta ke Pulau Borneo.

    “Tu sebengkah batang ajar ke patut diambi kitai dikena ngemansang menua enggau nengeri tu iya nya penyerakup enggau pengelantang ke tulin,” ku tandu iya.

    Berebak enggau nya, iya muji iring Tun Taib ngena chara ke betul sereta engkeman dikema dalam ngemansangka ajar Islam.

    “Tun bebendar ngerembaika ajar pengari tu maya nyadi ketuai Sarawak lalu kami temegah enggau pengulih Tun dalam ngerembaika ajar Islam ba sitak enggau manah sereta mandangka Islam chukup nelap dalam ngerembaika pengarap ngagai mensia mayuh sehari tu.

    “Kami rayat Sarawak deka neruska pengawa Tun lalu enti nadai penanggul kitai deka Sarawak ngena atur ke jelan iya sereta mereti dalam ngerembaika ajar Islam,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads