Header Ads

  • Baru Nyadi

    Perintah udah nyukat tanah NCR di Sarawak.

    ENDANG ENGGI RAYAT: Awang Tengah sereta bala pemesai ke bukai begambar begulai enggau bala ke nerima Gazet Rizab Komunal Bumiputera (Betanam-Betupi) Seksyen 6 Kanun Tanah Nengeri enggau Chek Pampas Tanah di Sibu, kemari.

    SIBU: Program Nyukat Kelingi Tanah Adat Bumiputera (NCR) Inisiatif Baru udah mujur nyukat 786, 293 hektar pemesai tanah ba 500 iti endur serata nengeri naka 31 Julai 2017 tu.

    Sapit Kepala Menteri Datuk Amar Awang Tengah Ali Hasan madah, ari penyampau nya, 627, 796 hektar ba 409 iti endur udah digazet.

    “Pengawa ke diatur perintah ti digaga enda bebayar tu ngembuan tuju deka ngenyampatka agi proses nyukat tanah ba nengeri tu laban ti kelalu besai sereta meri dokumen ngagai tanah adat rayat ke sebedau tu nadai penerang bekaul.

    “Udah tanah disukat kelingi, dia orang ke beempu tanah badu irau agi sekalika tanah sida dikeruga orang bukai laban udah digazet,” pia ku iya madah maya Pengerami Nyuaka Gazet Rizab Komunal Bumiputera (Betanam-Betupi) Seksyen 6 Kanun Tanah Nengeri enggau Chek Pampas Tanah ditu, kemari.

    Sama bela datai maya tu iya nya, Menteri Muda Pelajar enggau Pansik Teknologi Dr Annuar Rapa’ee, Kaban Kunsil Nengeri (ADUN) Ir Christopher Gira Sambang, Residen Sibu Hii Chang Kee enggau Pemesai Tanah enggau Servei Sibu Norlina Ra’ee.

    Nambahka jaku iya, Awang Tengah madahka perintah semampai chakah nyaup rayat meri kelala ngagai tanah adat asal nyema tanah nya endang enggi rayat empu.

    Tang ku iya, bisi mega sekeda sepeneka ngambu tanah orang bukai ketegal ti amu ngujungka nekul pengawa nyukat tanah kelinggi nya kelimpah mai penusah ngagai orang ke endang empu tanah.

    “Kitai ngarapka rayat meri kerejasama, madahka entara tanah ke bendar sereta anang kelalu nitihka pengeka ati diri ngambu tanah diri besai,” ku lalau iya.

    Enti udah diberi gazet, iya madah, nangkan ke nya, sida ke beempu tanah tau minta tanah sida disukat kediri sereta berundingka chara bakani ngemansangka tanah nya.

    “Ba tikas kedua tu, tanah tau disukat kediri enti sida ke beempu besetuju sebedau permit dikeluarka nengah Seksyen 18 Kanun Tanah Nengeri dikeluarka,” ku iya nambah baru.

    Bekenangka pampas ke dibayar maya nya, Awang Tengah madahka nya kelai perintah enda sepeneka ati ngambi tanah rayat kelimpah ari ngaga pemansang ti mai penguntung ngagai semua.

    Ku iya, pampas ke dibayar mega endang nitihka pematut.

    “Tanah rayat ti digagaka pemansang sigi diberi pampas magang lalu kitai enda ulih sepeneka ngambi hak orang (rayat).

    “Projek ke digaga mega endang ngira penguntung ngagai rayat baka pampas ke disua sehari tu dikena ngaga SK enggau SMK Permai Sibu tauka Balai Bomba di Selangau,” pia ku iya madah.

    Ba pengerami nya, empat iti endur disuaka gazet tanah iya nya di Sekuau enggau Sungai Sebindang (Ulu Oya), Jalai Sibu-Bintulu, Stapang (Selangau), Igu (Selangau) enggau di Batu 36, Jalai Oya, Tamin, Selangau (Area A).

    Chek pampas tanah disuaka ngagai sida beempu tanah alai ngaga projek SK enggau SMK Permai (Sibu), Balai Bomba dan Penyelamat (Selangau), ‘Alternative Site for SK Dudong (Sibu) enggau Ulu Sungai Merah 33/11 KV Substation (Sibu).

    Maya berandau enggau pengarang berita, Awang Tengah madahka kemaya empat bengkah projek nya digaga endang bepanggai ba ejensi ke ngaga projek.

    “Palan endur projek udah bisi tang tu bepanggai ba ejensi ke ngaga,” pia ku iya nimbal tanya.
    #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads