Program penyulut pelajar ke diatur Sarawak Energy di Baleh digulu 200 iku nembiak. - Berita Iban Online | Laman Web Berita Kitai

Header Ads

  • Baru Nyadi

    Program penyulut pelajar ke diatur Sarawak Energy di Baleh digulu 200 iku nembiak.

    KUCHING: Sebengkah program penyulut pelajar ungkup bala nembiak sekula ke ngambi peresa di Baleh udah dipejalaika enggau mujur.

    Program ke dikumbai ‘Jalinan Mesra Peribumi’ pengelama tiga hari, diatur Sarawak Energy enggau kerejasama Palan Pematih Pengajar (IPG) Kampus Sarawak enggau Opis Pelajar Pelilih (PPD) Kapit, mungkal program baru tiga taun, ari 2017 nyentuk 2020.

    Tu nampung Program Ngenegapka pelajar, ti udah dipejalai ari 2015 ngagai 2016 di kandang menua nya.

    Program tu udah diterima manah lalu udah digulu urung 200 iku nembiak, pengajar enggau apai indai Sekula Sekondari (SMK) Baleh sereta empat sekula primari – Sekula Primari (SK) Temenggong Koh, SK Sempili, SK Entuloh enggau SK Lepong Gaat.

    Ketuai Tanggungpengawa Rama Korporat (CSR) Sarawak Energy, Jiwari Abdullah madah, program tu dilangkar dikena nyediaka lalau ngaluska teknik enggau pengelandik bala nembiak nyaut tanya ke datai ari kandang menua Baleh nentuka penyapai akademik nyulut agi sereta ngambika sida ulih nampung pelajar ngagai tikas tinggi agi.

    “Nyadi sebagi ari komitmen kitai meri sukung ngagai komuniti menua pesisir, kitai deka terus chakah bejalaika pangku pengawa nyerungkai program nyikap bala nembiak ari kandang menua tu nyediaka diri nangkup peluang ke bisi diadaka ari Projek Kuasa Hidro Baleh,” ku iya nengah penerang berita, apin lama ke udah.

    Sama bisi datai, Direktor IPG Kampus Sarawak, Jamiran Salam begulai enggau Penyanding Penemu Khas Kaul Komuniti Sarawak Energy, Stell Sindau, bela datai ngulu program nya.

    Program tu nyediaka iring ba akademik enggau meri peransang ngagai bala nembiak ti napi peresa Sijil Penilaian Malaysia (SPM) enggau Ujian Pencapaian Sekolah Rendah (UPSR) taun tu, begulai enggau apai indai sereta pengajar.

    Bengkel tu nyengkaum licha peransang ngagai apai indai enggau pengajar bekaul enggau pemesai guna ngemeratka pekara pelajar, ngambika muka jalai ti nyenggala.

    Bala pengajar, enggau rikot nyulut nyediaka tips-tips peresa dalam Jaku Melayu, Jaku English, Matematik, Sains enggau Sejarah.

    Bala nembiak mega meri timbal ke alai sida udah belajarka teknik ti manah, tang muntang nyaut tanya peresa UPSR.

    Seiku nembiak SMK Baleh, Jimmy Bundan madah, iya ngasaika bisi agi pengandal pengudah ngulu program begulai enggau bala pelatih ari IPG Kampus Sarawak.

    Kennedy Jampung, siku ari pesereta bengkel datai ari raban apai indai madahka, program nya nyediaka penemu ti beguna bekaul enggau chara meri peransang ngagai bala anak ngambi ngemeratka perati sereta nyikap diri napi peresa UPSR enggau SPM.

    Ku Jamiran, program servis komuniti nya nyukung pemansang pelajar bala nembiak di sekula menua ulu di Sarawak.

    “Kitai temegah endar meda program tu diterima manah bala nembiak, pengajar enggau komuniti, sereta kaul tegal ba aktiviti ti dipejalai.

    “Tu dikearap ulih mantu nambahka minat ba pengawa ngemanahka atur ngajar enggau belajar di sekula pulaika pemaik ngagai bala nembiak,” ku iya.

    Ku iya nambah, IPG Kampus Sarawak endang ngenang pemanah pengawa dipejalaika SEB enggau Opis Pelajar Sarawak enggau kerejasama sereta sukung begulai Pelajar Pelilih enggau piak sekula.

    Kordinator Program, Ling Snelus Angking madah, program nya meri inspirasyen ngagai bala pengajar ngambika terus ngiring enggau mantu bala nembiak ba pelajar.

    “Fasilitator enggau pengelicha ari IPG Kampus Sarawak bela begulai gawa meri peransang ngagai bala nembiak di kandang menua pesisir tu,” ku iya.

    Sama bisi datai, Sapit Direktor IPG Kampus Sarawak, Gumbang Pura, pengari PPD Kapit, Fredy Mike, pengari SMK Baleh, Layang Lenam, enggau Chairman Serakup Apai Indai enggau Pengajar (PIBG) SMK Baleh, Gendang Sugit.

    Dikeranjai: Utusan Borneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads