Header Ads

  • Baru Nyadi

    Rolland ngarapka peranak Lasi nyukung penuh BN dudi hari.

    TEPA: Rolland (tiga kanan) nerima tepa ari Seman (dua kiba) seraya bala bukai ngemata.

    JULAU: Kaban Kunsil Nengeri (ADUN) Meluan, Rolland Duat andal iya udah menang di menua baru laban iya ngering diri empu bejalai ngabas menua ke alai iya nerima undi mimit agi ari orang ti ngelaban iya rambau pengawa bepilih nengeri ke udah.

    Rolland bisi bejalai ngagai siti ari menua ditu, ti kurang nyukung iya, kena Hari Lima tu tadi nyenggala ngayanka iya empu betul laban penatai iya diterima urung 300 iku nyengkaum 52 iku tuai rumah ari kandang menua besemak ke bisi datai ngulu gempuru Ketuai Enggau Komuniti di Rumah Seman, kandang menua Lasi.

    Tu pejalai keterubah iya ngagai kandang menua nya pengudah iya menang ba penuduk Meluan ngarika Ba-risan Nasional (BN) enggau majoriti mit 677 undi rambau pengawa bepilih nengeri se-taun ti udah, ku iya.

    Dalam pengawa bepilih, Rolland bulih 3,363 undi ngalahka 2,008 ti diulih chalun PKR Semana Sawang, 2,686 ulih Elly Lawai lalu 934 ulih Jerry Clement, seduai tu bela chalun Ngatika Diri.

    “Tebal agi awak aku ba taun keterubah nyadi pengari rayat udah dikena ngabas kandang menua ke alai aku bulih mayuh undi ari sida ti ngelaban aku.

    Aku pechaya aku ngaga pemutus ti betul laban bala penyukung endang patut nerima perati khas ari aku,” ku iya nerang.

    “Tentu mega rambau pejalai nya, aku ngagihka penyampau belanja Projek Mit Pemansang Menua Pesi-sir (MRP) enggau Program Transformasyen Menua Pesisir (RTP) kelimpah ari agih belanja pemansang ke bukai nengah mayuh bengkah opis menteri enggau ejensi,” ku iya nambah.

    Taja pia, iya nadai kala berunding deka nejuka kan-dang menua ke alai iya enda nerima sukung mayuh laban batang tuju iya nyangup diri empu nyadi pengari rayat deka gawaka rayat di Me-luan, ku iya, seraya nambah, nyadi peranak menua nya, iya chukup meretika juluk enggau peminta sida.

    Ba penemu iya, sekali udah dipilih, nyema semina ketegal siti undi aja, iya deka ngarika semua orang di sitak nya, ku Rolland nyemetak.

    Kebuah bukai iya mutuska diri laun ngabas kandang menua ti kurang nyukung iya laban nangika penatai diri enda diterima, ku iya nerang.

    Taja pia, pejalai keterubah ngagai kandang menua Lasi udah ngubah sagam ati iya laban pemayuh tubuh sida ke datai begempuru lebih ari 96 ti udah ngundi iya rambau pengawa bepilih nyin tadi, ku iya seraya meri terima kasih ngagai Tuai Rumah Seman ti udah ngepunka penyerakup nentuka pemansang Meluan dalam semua sukut.

    Iya mega berasai sinu meda pementas bala rayat ti ngaku sida udah ngaga pemutus ti salah rambau pengawa bepilih tu tadi lalu besemaya deka ngubah maya pengawa bepilih ti deka datai, ku Rolland ti merambu deka ngabas rumah panjai ke bukai dalam kan-dang menua nya udah tu.

    Rolland ngarap maya pengawa bepilih udah tu iya ulih menang enggau majoriti ti mayuh agi laban iya mai kelai kuasa ti besai dalam pengawa sida bekunsika agih pemansang.

    Tuai rumah panjai ti bejaku ngarika peranak di kandang menua nya madahka sida empu patut disalah laban enda diperatika Rolland.

    Iya meri terima kasih nga-gai Rolland ti udah meri sida peluang ngaku penyalah diri sereta deka gawa begulai eng-gau iya nentuka iya ulih nyapai tuju pengawa ngemansangka Julau sereta ngangkatka pe-manah ekonomi rama peranak iya.

    Berebak enggau program sehari nya, Rolland bisi nyuaka chek sepenyampau RM40,000 ke alai RM20,000 dikena minta sebidang tanah endur tanah pendam ke baru lalu RM20,000 agi dikena ngaga jalai ngelawa taba.

    Kelimpah ari nya, iya mega bisi ngemendarka geran RM20,000 ungkup wang turu Komiti Pemansang eng-gau Pengelikun Genturung Pendiau (JKKK) Rumah Seman, RM5,000 dikena ngatur program sehari nya sereta RM3,000 ungkup Biro Indu iya.

    Iya mega bisi ngemendarka RM2,000 baka ti dipinta Biro Indu ari Rumah Jimmy dikena meli perengka dapur.

    Sekeda bala ke bisi datai Ketuai Polis Pelilih Julau, DSP Bidol Noyeng enggau sekeda bala ketuai komuniti ke bukai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads