Header Ads

  • Baru Nyadi

    Seliahka igi penyakit HFMD, kemeranka pemeresi bala anak.

    KUCHING: Mensia mayuh lebih agi apai indai di Sarawak dilalau sereta dikeingatka ngambika ngemeratka pengerai anak nengah chara ngemeranka pemeresi dikena nyeliahka ari seberang penyakit lebih agi penyakit jari, kaki enggau mulut (HFMD).

    Jaku tangkan nya dipansutka, Direktor Opis Pengerai Nengeri Sarawak (JKNS) Dr.  Jamilah Hashim nyerumba kemisi am enggau kemisi  sekula diatu.


    “JKNS deka terus ngingatka pasal pemesai guna ngemeratka tikas pemeresi diri enggau kandang endur ngelinggi dikena ngurangka HFMD.

    “Nyema sepemanjai kemisi tu bisi anak baka kena renga, ulser mulut enggau meletur ba tapa jari, tapa kaki tauka punggung, anjung anak nya betemu lengkas enggau lutur.

    “Enti anak mit nya ditemu kena rampit HFMD, patut diau dirumah nyentukka abi nya gerai tauka kering lalu dalam timpuh nya pesakit anang begulaika enggau nama mit bukai nyengkaum bala menyadi nyentukka gerai, kelimpah ari  anang mai ngagai palan orang mayuh,” ku iya madah ngagai Utusan Borneo.

    Lebuh ti nerangka pasal HFMD nya, iya madahka, apai indai enda tau enda nentuka anak ngemeran sereta ngemeratka pemeresi baka masu jari ngena sabun enggau ai beresi sebedau makai enggau pengudah ke agu.

    Tutup mulut enggau idung ngena tisu maya batuk tauka pengkasi sereta muai tisu nya ke dalam tong uras enggau pengelengkas kelimpah ari nyeliahka diri ari bekunsi pemakai, ai irup, berus ngeli, labung tauka rengka main enggau orang bukai, ku iya.

    Berebak enggau tu lebuh ke ngenang pasal gaya kes HFMD di Sarawak, Dr. Jamilah madahka penyampau kes  ti diriputka ari 1 Januari ngagai 26 Ogos 2017 bisi 6,800 kes lalu ari penyampau nya bisi 269 kes udah dipasukka ngagai sepital. Nadai kes pemati diriputka naka ke diatu.

    Kelimpah ari nya ku iiya, dalam timpuh 1 Januari ngagai 26 Ogos tu tadi, bisi 31 buah taska enggau tadika udah ditutup di nengeri tu ketegal HFMD iya nya 13 di pelilih menua Kuching; lalu di Miri (lapan); Serian (tiga); Samarahan (dua) enggau Simunjan, Sri Aman, Dalat, Mukah enggau Bintulu sama ngerikutka sebuah ditutup.

    Ari penyampau semua taska enggau tadika ke ditutup  nya  bisi 18 buah ditutup di baruh Akta Pencegahan dan Kawalan Penyakit Berjangkit 1988, lalu 13 buah agi ditutup nitihka peneka institusyen nya empu.

    “Pengetua, pengajar enggau penyelia isntitusyen teuak palan penyaga patut lebih chakah sereta regas meresa tauka ngelala bagi anak mit ke ngayanka simptom rengga, ruam ba tapa jari enggau kaki lalu patut jampat enda ngulaika anak mit nya enggau sida ke bukai.

    “Pengawa meresa pengerai anak mit sebedau tama ke dalam kelas endang amat diperansang dikereja.

    “Lalu enda tau enda nukuka anak mit ke dirampit penyakit nya enda datai ke institusyen ambis kurang sepuluh hari, berengkah ari ti kena penyakit nya,” ku iya nerang silik ngagai Utusan Borneo.

    Nyema anak mit nya dirampit HFMD lebih agi ke bedau sekula, apai indai diperansang madah jampat ngagai Opis Pengerai Pelilih Menua ke semak tauka terus ngagai Pusat Ke Kesiapsiagaan dan Tindak Cepat Krisis (CPRC), JKNS ba lumur hotline: 082-443248/082-441780, faks: 082-443098, emel: cprc_sarawak@moh.gov.my,ninting Hari Satu ngagai Hari Lima (pukul 8.00 pagi  5.00 lemai) sereta Hari Enam, Minggu & Hari Besai (pukul 8.00 pagi  5.00 lemai).

    Dikeranjai: Utusan Borneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads