Header Ads

  • Baru Nyadi

    Sibu Jaya sempama ‘pegung emas’, dagang dipejalai ditu dijamin untung.

    BEJADI : Dr Hii (tengah) ngempat riben kelai bejadika hari keenam Pesta Sibu Jaya.
    SIBU: Sibu Jaya endang sempama ‘pegung emas’, ku Presiden Dewan Perniagaan dan Industri Cina Sibu Dr Gregory Hii.

    Ku iya, nyadi mengeri ke benung angkat mansang, Sibu Jaya bepenau nyadi palan beranakka puku pemadu manah.

    “Sibu Jaya tau dikumbai pegung emas ngagai bala pedagang ke deka beranakka puku ditu.

    “Semua bansa pekara dagang baik nya ari sukut pemansang, reta tanah sereta keresa bukai ngembuan rega ke tinggi.

    “Pangka pemansang enggau penyampau rayat ke majak mayuh nyamin untung genap pengawa dagang ke dipejalai ba Sibu Jaya.

    “Kelimpah nya, bekau ari pengelikun Sibu Jaya ke majak tejamin nengah pemisi balai polis diri empu sereta mayuh opis ejensi pengelikun digaga ditu,” ku iya rambau bejadika Pesta Sibu Jaya ke masuk hari keenam bepalan ba laman Komersil Sapphire East, Sibu Jaya kena Hari Tiga tu tadi.

    Sama bisi datai Menijar Kanan Distrepark Sdn Bhd Eddy Puah, ketuai raban bansa ke besemak sereta bala temuai bukai.

    Dr Hii madah, Sibu Jaya udah mayuh berubah nyema dibanding enggau beberapa puluh taun ke udah laban diatu chukup manah ungkup pengawa dagang enggau beranakka puku.

    “Laban ke nyadi Presiden Dewan Perniagaan dan Industri Cina Sibu, aku sedia bekunsi penemu enggau peneleba aku dikena ngangkatka dagang ba Sibu Jaya ngambika sida ulih nyadi raban ngereja pengawa ke manah ngagai piak bekuasa ke bekaul,” ku iya.

    Iya mega ngelalau komuniti dagang ba Sibu Jaya patut bekerejasama enggau pangan diri ke pemaik begulai sereta anang sesekali ngelanggar atur ke digaga piak bekuasa.

    “Ari utai ke dipeda, Sibu Jaya udah nyingkang ngagai lambar baru lalu komuniti dagang meseti ngerembai. Kita enda ulih agi ngereja pengawa baka ke dulu suba,’ ku iya.

    Dr Hii madah, pangka teknologi lebih agi bidang IT mega mayuh ngubah chara ngatur pengawa dagang.

    “Nadai kebuah kita (pedagang) enda bejalarka penemu IT laban nya ulih ngemansangka dagang kita nyema dikena enggau manah.

    “Tu mega nyau nyadi sebengkah pekara ke pemadu beguna ngagai pengawa dagang jeman diatu,” ku tandu iya.

    Dikeranjai Utusan Borneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads