1,400 iku peranak menua ulu nerima pemaik Projek SARES - Berita Iban Online | Laman Web Berita Kitai

Header Ads

  • Baru Nyadi

    1,400 iku peranak menua ulu nerima pemaik Projek SARES

    PERENGKA GUNA PEMUN: (Bediri di belakang ari kiba) Alice, Anyi enggau Dr Abdul Rahman ngemataka pengari peranak di kandang menua bekaul nyain setipikit nerima SARES.

    MIRI: Bisi 1,400 iku peranak deka nerima pemaik bekal elekterik 24 jam nengah Projek Skim Kuasa Elekterik Alternatif Menua Pesisir Sarawak (SARES) ti beungkus RM15 juta.

    Menteri Muda Bekal Elekterik Menua Pesisir Dr Abdul Rahman Junaidi madah tu ngaul proses ngaga renggat (fasa) keterubah ba tujuh buah genturung pendiau di sitak Long Bedian, Baram.

    Projek SARES di sitak Long Bedian iya nya inisiatif perintah nengeri nengah Opis Menteri Bekal Ai enggau Elekterik Menua Pesisir lalu dipejalai Sarawak Energy Berhad (SEB) ngena agih belanja ke udah diungkupka perintah nengeri enggau perintah besai.

    “Kitai ngarapka nengah pemisi bekal elekterik 24 jam, peranak di kandang menua tu ulih ngasaika perengka guna pemun tu sereta ngiga awak dikena ngubah tikas pengidup nengah pemaik tu,” ku iya.

    Abdul Rahman ke mega Kaban Kunsil Nengeri (ADUN) Damai bejaku nya lebuh Pengerami Nyuaka Sistem SARES ungkup rumah pnajai di Cluster Long Bedian, ditu kemari.

    Pemaik nya mega nyengkaum mantu nembiak sekula belajar sereta peranak di kandang menua tu ulih nambahka penatai pemisi nengah pengawa dagang.

    Ku Abdul Rahman nambah, konsep SARES ti bepelasarka komuniti iya nya projek nya dipejalai enggau kerejasama komuniti di kandang menua nya.

    Ba proses bejalaika projek tu, komuniti patut ngemendarka tanah sida dikena sereta meresika kandang menua ke dikena ungkup sistem nya lalu enda netapka peminta.

    Pengudah tembu digaga, sistem nya deka diberi ngagai komuniti ungkup operasyen sereta ngaga pengawa ngintu ninting maya, lalu SEB deka ngaga pengawa ngintu ‘berkala’.

    “Sistem nya deka tan lama agi nyema diintu enggau manah lalu SEB mega deka meri pengawa latih ngintu sereta meri penerang enggau chara bejalai sereta ngintu sistem tu,” ku iya.

    Komuniti di kandang menua nya mega dipinta enda ngachau nama pan sambung ba meter tauka masang kelalu mayuh kereban elekterik ba ruang bilik ti ngeluie ari ke patut.

    Entara genturung pendiau ti bisi nerima SARES iya nya Long Urang enggau Long Leng (Layun), Long Latei enggau Long Win (Apoh), Long Kevok, Long Jenalong sereta Long Liwok (Long Nito).

    Ba pekara ti sama, iya madahka peratus bekal elekterik ungkup peranak menua pesisir iya nya 89.6 peratus lalu 10.4 peratus agi ti nyengkaum 30,400 ruang bilik bedau nerima bekal elekterik 24 jam.

    Opis Menteri Bekal Ai enggau Elekterik Menua Pesisir diatu benung chakah sereta bekerejasama enggau Opis Menteri Menua Pesisir enggau Kandang Menua (KKLW) dikena ngulihka agih belanja ngambika selampur Sarawak bulih bekal elekterik ba taun 2025.

    Sama bisi datai iya nya Kaban Parlimen (MP) Baram Anyi Ngau, Sekretari Mendam Opis Bekal Ai enggau Elekterik Menua Pesisir Sarawak Dato’ Alice Jawan sereta Pemangku Residen Miri Nyurak Keti. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads