Header Ads

  • Baru Nyadi

    20 stesyen minyak mit #Smart dibuka di menua pesisir

    Tan (dua kanan) nerima plak tanda terima kasih ari Awang Tengah (empat kiba) ke bisi enggau ngulu Hari Koperasi Negara ti bisi digaga di Tanjung Manis (4-6 Ogos).
    KUCHING: Smart Stream Resources, sebuah kompeni ke diempu seratus peratus Bumiputera deka muka 20 stesyen minyak di menua pesisir di Sarawak.

    Sapit Kepala Menteri Datuk Amar Awang Tengah Ali Hasan madah kompeni tu deka ngaga stesyen minyak mit ti betatika sukut pengelikun (Akta Kemajuan Petroleum 1974), ngambika ulih meri pengelantang pendiau komuniti menua pesisir ngulihka bekal petroleum ba rega, kuantiti sereta kualiti sebaka enggau mengeri.

    "Kelimpah ari nya nyendiaka perengka guna palan belepa (Rest and Relax tauka R&R) sereta meri peluang dagang enggau pengawa puang, ngangkatka sosio-ekonomi komuniti menua pesisir," ku Awang Tengah.

    Iya madah munyi nya ba aum media pengudah bechairmanka Aum Bejuraika Koperasi Menua Sarawak (MPKN) Bil 1/2017 di sebengkah hotel ditu, pagi tu tadi.

    Gaya stesyen minyak di menua pesisir ke deka sereta benung digaga ulih Smart Stream Resources
    Awang Tengah ti mega nyadi Menteri Pengawa Industri enggau Pemansang Orang Dagang madahka kediatu, penyampau peminta ke deka ngaga stesyen minyak baruh bungkur Smart Stream Resources bisi dalam 20 peminta.

    Ari penyampau nya, dua (benung digaga di Tanjung Manis enggau Stapang (dalam sitak Selangau), 8 peminta benung diproses lalu 10 buah laluh nya, agi benung ngiga endur ngipa dagang nya.

    Lapan buah ke benung di proses diatu, deka digaga di Tanjung Manis, Stapang, Julau, Maradong, Belawai, PNK Pusa (palan orang berikan), Nyabor di Kabong enggau Sg. Maaw di Sibu.

    "Tu pekara ke manah kena mantu komuniti kitai di menua pesisir," ku iya.

    Sebedau nya, Direktor Besai Smart Stream Resources, Mohd Khairuddin Saimon madahka konsep stesyen minyak tu ngatika diri lalu ukai baruh pegai Petronas, Shell tauka kompeni minyak bukai.

    "Kami baru berengkah ngaga di Tanjung Manis enggau Stapang, lalu ngarapka ke bukai nya mega ulih digaga enggau jampat," ku iya.

    Di Semenanjung, Smart Stream Resources udah muka di zon baja Kuala Lipis, Felda Sg Panching Selatan (Kuantan), Kpg Baru Salong (Pekan), Felcra Sri Makmur (Pekan), Felcra Gugusan Pahang Tenggara (Pekan), Felda Mayam (Bera), Felda Jenderak Utara (Kuala Krau), sereta sitak menua pesisir bukai.

    "Tagit kami taun tu enggau taun baru tu ila, ulih ngaga 45 buah unit di menua pesisir di menua tu," ku iya.

    Sama bisi enggau ngulu aum media nya kemari, Direktor Suruhanjaya Koperasi Malaysia pampang Sarawak, Osman Ismail, Direktor Opis Dagang Dalam Menya, Koperasi enggau Pengawa Bebeli Barang (KPDNKK Sarawak) Dato Stanley Tan, sereta tuai pemesai ejensi perintah bukai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads