Header Ads

  • Baru Nyadi

    Abang Johari agi mengkang nyadi presiden SABERKAS

    DISAUP KOMITI BARU : Abang Johari madah gaga ati meda rintai komiti baru SABERKAS diarika mayuh pupu bansa enggau pengarap.

    KUCHING: Kepala Menteri Datuk Patinggi Abang Johari Tun Openg agi mengkang ngetanka penuduk iya nyadi presiden Serakup Nembiak Nasional Sarawak (SABERKAS), ke bela beratika pengawa bepilih SABERKAS kemari milih sapit presiden baru sereta tiga iku mandal presiden.

    Menteri Pengawa Dagang Temuai, Nembiak, Lumba enggau Main Datuk Abdul Karim Rahman Hamzah, ke kala mangku pengawa mandal presiden sebedau tu, dipilih nyadi sapit presiden nganti Sapit Speaker Kunsil Nengeri, Datuk Roland sagah wee Inn.

    Kelimpah ari nya, tiga iku mandal presiden ke baru dipilih, iya nya ADUN Layar, Gerald Rentap Jabu, ADUN Telang Usan, Dennis Ngau enggau Menteri Muda Menua Pesisir (Elektrik) Dr. Abdul Rahman Junaidi, lalu Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek), Sharifah Hasidah Sayeed Aman Ghazali agi mengkang ngetanka pangku pengawa iya nyadi mandal presiden, pangku pengawa ke dipangku iya kenyau ke dipilih dalam taun 2013.

    Pengudah ngerintaika nama pemesai komiti ke mangku pengawa, Abang Johari mega ngambi peluang nya madahka Menteri Muda ke betanggungjawab dalam pekara Korporat, Abdullah Saidol dipadu nyadi Sekretari Besai SABERKAS ke baru.

    Ba timbal Abang Johari bekaul enggau rintai baru SABERKAS nya, iya madahka pengaga ati iya meda rintai baru pemesai komiti nya, laban diarika mayuh pupu bansa sereta pengarap, ke nyadi pemerat SABERKAS ngelama tu, nuju jalai dikeingin serakup nya.

    “Aku pechaya nengah rintai komiti baru tu, pengeransing sida deka ulih ngemansangka agi nembiak di Sarawak. Aku ke nyadi presiden arapka sida ulih mantu aku nyapai pekara ke baru ungkup pemansang Sarawak,” ku iya.

    Ba lansa bukai, Abang Johari mega madahka pangku pengawa raban pemesai tu tau dipadah raban pemesai ke nginsit mansang ke mua rebak baru.

    Lebuh nyebut pasal TGM (aum tiga taun sekali) SABERKAS tu ila, nyangka SABERKAS deka ngembuan ketuai baru, tang taja pia, ku iya, iya ke nyadi presiden diatu enggau naka ulih ngelatih sereta belubah nurunka kuasa iya ngagai komiti SABERKAS, lalu beratika SABERKAS ba penuduk ke manah.

    “Nyadi presiden kita, aku enggau naka ulih ngiring ngembing kita dalam kandang tiga taun tu (sebedau TGM nangkan tu ila). Aku deka meda sida tu ulih ngemansangka nembiak Sarawak, baik nya dalam Lumba enggau Main, Pengawa Rama, sereta ekonomi,” ku iya.

    Kelimpah ari nya, iya ngarapka SABERKAS deka majak ngangkatka tambai ke bala nembiak di Sarawak.

    Sebedau nya, Roland lebuh dirandau, laban iya ke nyadi orang ke megai pengawa mantaika nama komiti baru SABERKAS, urung 215 pengundi muai undi sida iya ba aum TGM nya ke diatur berengkah 14 nyentuk 16 Oktober tu tadi.

    Nama bala komiti ke mangku pengawa udah dipadah maya pengawa makai lemai SABERKAS ditu, malam kemari. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads