Header Ads

  • Baru Nyadi

    Alumni sekula patut nyaup ngemansangka sekula diri

    MIRI: Alumni sekula patut nyaup ngemansangka sekula diri empu, ku Kaban Kunsil Nengeri (ADUN) Telang Usan Dennis Ngau.

    Iya madah, saup nya ulih mandangka kelai terima kasih sida ngagai sekula ke udah nempa sida nyapai pemujur.

    “Pemujur kitai sehari tu asil tempa ari sekula terubah alai kitai belanja lalu ingatka pemanah bala pengajar ke udah nempa kitai nyentuk nyadi orang ke menyana.

    “Nya alai, kitai patut bejalaika tanggungpengawa diri nyaup sekula nya kelai kitai ingatka pemanah sekula nya lalu nyaup ngemansangka sekula ke kala alai kitai ngulihka pemandai,” ku iya.

    Dennis madah munyi nya rambau pengerami makai lemai betemu baru ex-nembiak 1978-1982 sereta bejadika Alumni SMK Long Lama ke bisi digulu lebih 80 temuai ba sebengkah hotel tebilang ditu, apin lama ke udah.

    Dennis madah bala alumni sekula endang nyadi pelasar nyaup sekula enggau bala nembiak nengah mayuh chara.

    “Entara nya baka bala ex-nembiak ke udah teulihka pemujur sida ulih nyadi mentor ngagai bala nembiak, ajar sida ba pekara pelajar sekula.

    “Aku andal amat nengah chara nya, kitai ulih meri peransang ngagai bala nembiak teulihka pemujur sereta penyulut sebaka enggau mentor sida,” ku iya.

    Tambah mega, ku iya tanggungpengawa alumni beguna amat dalam mantu ngemansangka sekula kelimpah ari ajar apai indai enggau bantu bala pengajar ba sekula empu.

    Nya alai, iya deka meda alumni SMK Long Lama ke baru udah dipenyadi ulih berejista ba Opis Pengerejista Bansa Malaysia ngambika ulih chakah agi mantu ngemansangka SMK Long Lama.

    Ba pengeremi nya, Dennis bisi ngungkupka belanja RM8,000 ngagai alumni SMK Long Lama dikena sida ngatur aktiviti.

    Sama bisi datai Presiden Alumni SMK Long Lama Guyang Langkau. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads