Buai peragam ti ngumbai aktiviti lumba masau jam - Berita Iban Online | Laman Web Berita Kitai

Header Ads

  • Baru Nyadi

    Buai peragam ti ngumbai aktiviti lumba masau jam

    MANAH KE PENGERAI: Nyalau (dua kiba) enggau Dr Rayong (dua kanan) nguluka mensia mayuh besenam nyerumba Hari Lumba Menua Renggat Sri Aman ba Dataran Rusa, Engkilili.

    ENGKILILI: Mensia mayuh diperasang semampai ngemeranka aktiviti lumba lalu muai peragam ti ngumbai pengawa nya nadai guna sereta masau jam.

    Kaban Parlimen Lubok Antu Datuk William Nyalau Badak madah, diatu mayuh orang nadai beratka pengawa besenam ketegal ti kelalu kiruh ngereja pengawa besehari sehari tang nadia nemu aktiviti nya pemadu manah ke pengerai tubuh.

    “Ukai pekara ke nyelai nyema mayuh entara kitai madah diri nadai besenam taja sekali dalam sebulan lalu bisi mega ngumbai aktiviti nya semina masau jam...penemu ke baka nya salah laba besenam ulih ngasuh tubuh enggau runding sesiku orang bepengerai,” ku iya.

    Iya madah munyi nya rambau bejadika Hari Lumba Menua Renggat Bagi Menua Sri Aman diatur Opis Nembiak enggau Lumba Sri Aman sereta Opis Kunsil Pelilih Mit Engkilili ba Dataran Rusa, Pasar Engkilili ditu kena Hari Enam minggu ke udah.

    Nya alai, Nyalau nyadaka sukung ngagai Program Hari Lumba Menua dikena nerenak ulah rinduka pengawa lumba dalam komuniti lebih agi ba Parlimen Lubok Antu ke mungkur DUN Engkilili enggau Batang Ai.

    “Program nya mega betuju nanggam kaul komuniti puou bansa enggau jalai pengarap, tuai bika begempuru baka dipeda kitai sehari tu,” ku iya.

    Tambah mega, Opis Menteri Nembiak enggau Lumba udah bejalaika pengawa ke chukup manah milih minggu kedua bulan Oktober ninting taun nyadi Hari Lumba Menua bepun 2015.

    “Tu setipak bendar enggau agenda menua deka nempa Malaysia nyadi menua lumba tauka dikumbai ‘Sporting Nation’,” ku iya.

    “Tambah mega nyema kitai minta penemu orang ti landik ba pekara pemakai bekaul enggau gaya tubuh enggau runding ti bepengerai dia iya ngasuh kitai patut regas besenam,” ku iya.

    Ku iya, rayat patut nyaga pemakai sereta nyeliah diri kelalu mayuh makai utai kelalu manis, mayuh lemak sereta makai jauh malam.

    “Kelimpah nya kurangka nginsap sereta ngirup ai bisa kelalu mayuh laban nya enda manah ke pengerai,” ku iya.

    Program sehari dirichahka enggau mayuh aktiviti baka senamrobik, bedarat ngelingi pasar Engkilili, pekit nyumpit, pekit nyura ungkup anak mit, nyabut tiket benasit enggau mayuh agi ke bukai.

    Sama bisi datai Kaban Kunsil Nengeri Engkilili Dr Johnical Rayong Ngipa, SAO Brain Munsang, Sekretari Opis Kaunsil Pelilih Lubok Antu Joseph Phang, pemesai JASA Geoffery Maba, bala pengari opis perintah, ketuai raban bansa enggau mensia mayuh besemak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads