Chara nikika penatai pemisi rayat seruran diperunding - Berita Iban Online | Laman Web Berita Kitai

Header Ads

  • Baru Nyadi

    Chara nikika penatai pemisi rayat seruran diperunding

    Datuk Seri Najib Tun Razak
    Perintah seruran berundingka chara dikena nentuka penatai pemisi rayat niki seriris enggau juluk menua tu.

    KUALA LUMPUR: Perintah seruran berundingka chara dikena nentuka penatai pemisi rayat niki, lebih agi raban kurang penatai pemisi enggau numbas pemesai, seriris enggau juluk nempa Malaysia nyadi menua besai penatai pemisi.

    Menteri Besai Datuk Seri Najib Tun Razak madah pengawa perintah berengkah ngayanka asil pengudah penatai pemisi rayat ba kategori baruh B40 enggau numbas pemesai M40 niki enggau chukup nyata.

    “Tambah mega, tikas penyeranta mega nurun,” ku Najib dalam penerang pemadu baru dalam blog NajibRazak.com bekaul enggau penatai pemisi rayat.

    Raban B40 iya nya ruang bilik ke ngembuan penatai pemisi ninting bulan kurang ari RM3,860 udah nya M40 iya nya raban ruang bilik ke ngembuan penatai pemisi ninting bulan RM3,860 ngagai RM8,319.

    Najib madah, nitihku EPU tauka Unit Pengatur Ekonomi, pupu rata penatai pemisi sepintu ruang bilik raban B40 niki urung 76 peratus ba taun 2014 kenyau ari taun 2009. Udah nya ungkup raban M40, pupu rata penatai pemisi sepintu ruang bilik niki nyau deka manggai 60 peratus ungkup timpuh ke sebaka.

    Ari sukut pupu rata penatai pemisi pengereja pengawa, dalam genap sektor, pansik silik Opis ‘Perangkaan’ mandangka penatai pemisi niki urung 20 peratus ba taun 2016 ungkup timpuh tiga taun sebedau tu, ku Najib ke mega Menteri Wang.

    “Tu entara kelai penuduk gaji pengereja pengawa ari perati penuh bisi insur ke manah,” ku iya.
    Nitihku menteri besai, taja penatai pemisi nya pemujur ari inisiatif perintah baka program nikika penatai pemisi ba menua pesisir, peniki gaji minimun, enggau mega mayuh program pengawa dagang, sereta semangat deka besemekih enggau pengeransing rayat nambahka penatai pemisi diri endang nyadi penyaup pemujur besai tu.

    “Nya alai, pupuk mih semangat deka besemekih laban munyi ku jaku sempama ‘penyamai nya sigi enda datai muntang’. Nya kebuah aram mih kitai bela besaup ngemansangka ekonomi menua laban nya enda ulih dikemansang nengah pengawa siti piak aja,” ku menteri besai. # Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads