Header Ads

  • Baru Nyadi

    Chara pemadu engkeman ngurangka tating mai bup benung diperunding

    KOTA SAMARAHAN: Menteri Pelajar, Sains enggau Pansik Teknologi Dato Sri Michael Manyin Jawong deka ngiga chara ti pemadu engkeman dikena ngurangka tating nembiak kelalu mayuh mai bup sekula kelimpah ari bup teks di nengeri tu.

    Iya madah, enda betul nating nembiak lebuh agi sida ba renggat sekula primari mai mayuh bengkah bup ke sekula ninting hari.

    Bechuntoka chara ti dipejalaika di Finland, Manyin madahka nembiak enda ditating penanggul mai bup ti berat nyengkaum kereja rumah ke diberi pengajar.

    “Entara sistem pelajar pemadu manah di dunya iya nya Findland, nembiak nadai kereja rumah, semina semina ngambi peresa maya beumur 16 taun.

    “Pekara tu deka diperatika kitai. Enda betul nating nembiak ngena chara mai bup lebih ari 10 kilogram, kitai enggai nembiak kitai semina ngingat tang mereti enggau belajar,” ku iya.

    Iya mansutka pekara nya lebuh dikerandau pengudah pengerami nangguhka Aum Antarabansa Penerbitan Buku Borneo 2017 ba Auditorium Universiti Malaysia Sarawak (UNIMAS) ditu, kemari.
    Ngenang pasal kemisi sekula taun baru ti dipadahka udah Hari Gawai, Manyin madahka, sida deka betemu enggau Opis Menteri Pelajar nentuka pekara ke amat.

    “Pasal kemisi sekula aku enggai nyebut dulu pasal nya, aku deka ke Kuala Lumpur lalu betemu enggau piak bekau, deka nemu pekara ke amat.

    “Enda lama agi aku deka kin, aku deka madahka pekara tu enti aku udah betemu enggau sida,” ku iya.

    Bejaku baru iya madahka engka bisi pengilap mimit baka ke nyadi apin lama pasal hari bulan Awal Muharam ti kena Hari Lima dibandingka enggau Hari Empat baka ke dirikod dalam kalender.

    Ngenang pekara bukai, Manyin madahka taun tu sepenyampau 417 sekula primari di nengeri tu ke ngembuan kurang ari 10 nembiak ngambi peresa Ujian Pencapaian Sekolah Rendah (UPSR).
    Ku iya madah baru, sepenyampau 651 sekula kurang nembiak ari 150 iku di nengeri tu.

    “Tu pekara ti dipekuhka kitai diatu. Kitai benung meri penerang ngagai apai indai pasal ngempung sekula tu,” ku iya.

    Dulu ari nya, lebuh bejaku ba pengerami nya Manyin ngarapka pesereta aum besai nya bulih asil lalu nyelak bup pasal penyelai Borneo ti kaya enggau pesaka, main asal, raban bansa enggau ke bukai.

    Sama bisi datai Sapit Mandal Canselor (Pansik enggau Inovasyen) Unimas Prof Dr Kopli Bujang enggau Sapit Mandal Canselor Pekara Pelajar enggau Alumni Prof Mohd Fadzil Abd Rahman. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads