Dua buah koperasi deka bekerejasama muka dandang kebun nanas di Beladin - Berita Iban Online | Laman Web Berita Kitai

Header Ads

  • Baru Nyadi

    Dua buah koperasi deka bekerejasama muka dandang kebun nanas di Beladin

    Datuk Amar Haji Awang Tengah Ali Hasan
    KUCHING: Koperasi Serbaguna Anak-anak Selangor deka bekerejasama enggau sebuah koperasi di Beladin muka 1,500 ekar tanah alai bekebun nanas.

    Sapit Kepala Menteri Datuk Amar Awang Tengah Ali Hasan madah, industri kebun nanas siti pengawa ti bisi peluang ke besai, seriran enggau atur perintah nengeri diatu ti ngemeratka Sarawak nyadi ‘Food Basket’ ke menua tu.

    “Sarawak baru deka berengkah enggau industri bekebun nanas, ke deka nyadi siti peluang besai ba industri bekebun menua tu, seriran enggau atur perintah nengeri ke deka ngemansangka industri tu.

    “Berindik ari tu koperasi Serbaguna Anak-Anak Selangor deka bekerejasama enggau koperasi kitai di Beladin, ke alai sida di Beladin udah muka tanah sida ngambika dikemansangka enggau kebun nanas.

    “Nambah enggau nya mega, koperasi Serbaguna Anak-Anak Selangor pan deka mantu industri nanas di Beladin tu nengah bungkur kaul sida lalu deka ngangkatka ekonomi digital ba industri tu nyual produk tu nengah chara ‘online’,” ku Awang Tengah.

    Iya madah munyi tu lebuh bejaku ba aum media pengudah nyadi chairmanka Aum Bejuraika Pekara bekaul enggau Koperasi Nengeri Sarawak (MPKN) Bil. 1/2017 di sebuah hotel ditu, ensanus.

    Awang Tengah ti mega Menteri Pengawa Industri enggau Pemansang Orang Dagang madah baru, enti koperasi di Beladin nya ulih bekerejasama enggau koperasi Serbaguna Anak-Anak Selangor, dikearapka koperasi di Beladin nya ulih ngerembaika makit sida nengah bungkur kaul Koperasi Serbaguna Anak-anak Selangor nya ila.

    Berebak enggau nya, iya madahka Koperkasa nengah koperasi mega ulih ngerembaika pengelandik sida nengah kerejasama enggau peribit, kelebih agi dalam pemansang reta tanah, ke alai nengah kerejasama nya ila, deka nyengkaum koperasi ngaga ‘Biz Park’ ke deka digaga di Kuching.

    Sebuah ‘Biz Park’ dipelabaka deka digaga di Semariangdalam kandang taun baru tu ila.

    “Gaya pengawa Koperkasa dalam pekara tu deka dipejuraika kededua piak silik agi. Sida koperasi ukai semina bepanggai ba ejensi perintah aja, tang sida ulih ngerembaika aktiviti sereta kerejasama sida enggau sektor peribit.

    Sebedau nya, Direktor, Suruhanjaya Koperasi Malaysia (pampang Sarawak), Osman Ismail madahka data besai Koperasi Nengeri Sarawak kena 30 Jun 2017 udah ngerikod penyampau koperasi ke direjista di menua tu ke bisi 1,020 buah, enggau penyampau raban dalam 352,000, syer (RM173.6 juta), Aset (RM570.2 juta) enggau penguntung (RM137 juta).

    “Kami bisi tabung ke dikumbai ‘modal pusingan’ ke alai koperasi ulih nginjau duit ari ‘tabung pusingan’, enggau lalu penyampau ke pemadu mayuh ulih diinjau iya nya RM10 juta.

    “Nya alai, nyema bisi koperasi tauka kaban koperasi ke deka nginjau duit ari modal pusingantu, sida tau minta nitihka gaya projek ke deka digaga.

    “Koperasi menua tu pan bisi nyendiaka bantu khas ngagai koperasi ke mit-mit ngambika bisi dikena sida ngepunka dagang,” ku iya.

    Enti di Sarawak ku iya, tabung pusingan penyampau duit ke ulih dijali koperasi semina RM4 juta, koperkasa (RM2 juta), Koperasi Harwood (Sejuta).

    “Kami meransang kelebih agi koperasi ke mit-mit ti deka numbuhka pengawa tauka projek ke begunaka modal, tau nginjau duit ari koperasi ke besai,” ku iya.

    Sama bisi enggau ngulu pengawa nya, Sekretari Mendam Ba Opis Menteri Industri, enggau Pemansang Orang Dagang (MIED), Direktor Opis Menteri Dagang Dalam Nengeri, Koperasi enggau Pekara Bebeli Barang (KPDNKK), Dato Stanley Tan, bala ketuai ejensi, chairman enggau raban Kaunsil Koperasi ari serata menua tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads