Header Ads

  • Baru Nyadi

    Industri biomas dikearap ulih ngangkatka tikas ekonomi Nengeri Sarawak, ku Abang Johari

    Datuk Patinggi Abang Johari Tun Openg
    KUCHING: Inisiatif Ekonomi Digital Menua ke diberi kelala, Pelin Pemansang Industri Biomass Sarawak (SBIDP) deka ditegapka nengah chara ke silik agi nuju dunya digital ke deka meri empas ngagai semua bengkah pekara ke bekaul, nyengkaum pengawa betanam betupi.

    Penengkeman ba pekara betanam betupi, baka ngena drone sereta pengulih bukai deka mantu mutarka penanggul dalam industri betanam betupi baka ngasil,ngurangka orang gawa ba kebun, pengelandik lalu ke berat endar iya nya ngemanahka agi semua ungkus mindahka pemisi baka biomas, ke ulih dikena nengah teknologi baru.

    Kepala Menteri Datuk Patinggi Abang Johari Tun Openg madah industri Sarawak ke mayuh agi tebal agi industri gadung, nyadi singkang manah amat ke menua tu, laban Sarawak ngelama tu nyadi pengeksport pemisi mata baka kayu, minyak enggau gis sereta Minyak Mata Sawit (CPO).

    “Kami ngarapka pemansang industri biomas ulih ngangkatka Sarawak nyadi sebuah menua ke ngembuan pemisi ke besai, nyengkaum ngembuan ekonomi ke sama rata di serata menua.

    “Ketegal nya, Sarawak ulih mantu Malaysia ngangkatka penuduk nyadi Hub Menua Memproses Biomas ke peminta ke tinggi ba renggat ke baruh. Pejalai menua tu baru berengkah, komitmen kami majak tegap, lalu kami mega ba jalai ke betul, nyingkang nuju tagit, tang kami begunaka sukung sereta peluang kerejasama ari prang ke bisi pemerat di menua tu sereta entarabansa, ngambika pengawa tu deka meri asil ke manah ngagai semua kitai,” ku Abang Johari.

    Iya madah munyi nya nengah teks jaku iya ti dibacha Sapit Kepala Menteri Datuk Amar Douglas Uggah Embas ba atur pengawa Konferen Biomass Entarabansa Malaysia 2017 (IBCM 2017) ‘Revolusi Industri Biomass 4.0: Innovation-Led-Bio-Based Economy’ di Palan Konvensyen Borneo Kuching (BCCK) ditu,kemari.

    “Sarawak bisi ati deka ngerembaika ekonomi nengah Bio-ekonomi, nyengkaum ngaga Biomas nyadi sebagi ari ubah nya. Ketegal nya, siti langkar sereta perambu deka digaga Tim Pengereja Pengawa Perintah Besai- Nengeri, betuaika Unit Perambu Menua.

    “Sarawak ulih nguluka pemansang sepuluh pelan biominyak tauka biokimia berenggat, nginsit ari 6 juta tan ngagai 19 juta tan biomas dalam empat bengkah kluster Bintulu, Miri, Tanjung Manis enggau Kuching dalam kandang 10 ngagai 15 taun tu ila,” ku iya.

    Abang Johari ti mega Menteri Wang sereta Perambu Ekonomi madah, ngulihka peluang tu sigi mudah tang Sarawak ba penuduk ke manah endar ngamatka peluang nya sereta nyukung peneka Malaysia dalam NBS2020 (National Blue Ocean Strategy 2020).

    Ari pansik ke digaga Ejensi Inovasyen Malaysia nengah kerejasama enggau Komiti Pemandu, penyampau pemisi Biomas, ungkus sereta pemujur aktiviti ba renggat ke baruh ulih meri penguntung ngagai rayat menua tu, sereta meri empas ngagai rama enggau ekonomi menua.

    Tu mandangka Sarawak bisi peluang ke besai ngangkatka biomas teulihka urung RM4.8 bilion kelimpah muka 30,000 peluang kereja nyengkaum RM18 bilion peluang beranakka puku dalam semua rintai penyampau biomass.

    Ku iya baru, tu peluang ti unik ke Sarawak nyadi ketuai sereta bepeluang nyadi pemungkal Asia laban Sarawak bisi pemisi bio bukai, ke ulih digulai baka konsep bekunsika ekonomi.

    “Sarawak ngembuan tanah ke besai, nya alai perintah nengeri enda tau enda majakka kaul menua tu enggau perintah besai, ngambika ulih ngemanahka agi infrastruktur industri, bungkur perengka pengangkut sereta sistem logistik ti beratika peminta ari industri baka biomas sereta dagang bukai ke majak mansang.

    “Ke komuniti biomas entarabansa, kami nyamin Sarawak komited ngangkatka industri biomas tu ngagai renggat ke tinggi agi. Sarawak ulih nyadi endur alai kitai neritka kaul sereta kaling dagang, lalu ke berat endar pemisi biomas nyadi palan ke mayuh agi macham dagang bepelasarka bio, ke ulih digaga ba renggat kandang menua sereta inisiatif ngerembaika biomas menua tu ngagai renggat global,” ku iya.

    Sama bisi enggau ngulu atur pengawa tu kemari, Menteri di Opis Menteri Besai, Dato Sri Nancy Shukri, Sapit Menteri Dagang Entarabansa enggau Industri, Datuk Ahmad Maslan, Ketuai Delegasyen European Union ke Malaysia, Maria Castillo Fernandez, Duta Republik Korea ngagai Malaysia, Dr. Yu Hyun-Seok, enggau Duta Kingdom of the Netherlands ke Malaysia, Karin Mossenlecher. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads