Industri randaka graduet dalam bidang teknikal - Berita Iban Online | Laman Web Berita Kitai

Header Ads

  • Baru Nyadi

    Industri randaka graduet dalam bidang teknikal

    Dr Hassan Hasbollah
    Apai indai patut meransang anak nempa penemu dalam bidang tu ti pulaika pemaik sida jemah ila.

    MIRI: Apai indai patut sedarka pemaik bidang pelajar teknikal enggau vokasional ti ulih ngadaka bidang kereja engkeman ke dipinta industri kemaya hari tu.

    Pemesai Pelajar Pelilih (PPD) Miri, Dr Hassan Hasbollah enda ngenggaika pemesai guna akademik tang menua diatu mekuh ngagai industri ti begunaka pengereja pengawa ti bepengelandik.

    “Apai indai patut sedarka menua beguna endar orang gawa bepengelandik, kompetitif enggau ulih besemekih dikena ngisi pengawa puang ba bemacham industri,” ku iya rambau Karnival Kemahiran Sinar Kecemerlangan (KSK) di Balai Suarah Miri kemari.

    Dikena nangkup peminta nya, PPD Miri ku iya begulai enggau Sekula Sekondari (SMK) Baru Miri ngena chara proaktif ngatur Karnival KSK.

    Karnival nya udah disereta nembiak pom 3, 4, 5 enggau sida ti udah lepas Sijil Pelajaran Malaysia (SPM) di 11 buah sekula sekondari di Miri.

    “Karnival tu meri pemerat ngagai pengawa meri penerang pasal peluang pelajar dalam bidang teknikal enggau pengelandik kelimpah ngemai kelala Sijil Kemahiran Malaysia (SKM),” ku iya.

    Nitih ku iya, dataika bulan Julai tu tadi, bisi 412 iku nembiak ari sekula sekondari ngelingi Miri udah rejista kus SKM lalu penyampau nya dipelaba terus nambah.

    “KSK deka nambahka kerejasama entara piak sekula enggau Pusat Bertauliah SKM dikena ngangkatka pemanah pelajar enggau nyapai modal mensia ti beguna,” ku iya nerang.

    Berindik ari nya ku iya, apai indai enda ibuh mejak bala anak nyapai penyulut dalam akademik tang berengkah muka runding ngagai bidang pengelandik.

    “Apai indai dikearap meretika agi minat enggau pengulih bala anak sida lalu bela begulai ngiga alternatif dikena mantu ngerembaika pengulih sida,” ku iya.

    Ba lansa ke bukai, KSK mega udah nerima penatai lebih 400 iku nembiak nyengkaum apai indai enggau pengawa ngisi aktiviti mandangka mayuh bengkah palan pengelandik perintah enggau peribit.

    Pengawa tu udah dipenyadika Menteri Muda Kaunsil Kandang Menua, Datu Dr Penguang Manggil ti ngarika Sapit Kepala Menteri, Datuk Amar Douglas Unggah Embas. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads