JPBM udah nyendiaka diri napi ampuh bah
Cari Berita

Advertisement

JPBM udah nyendiaka diri napi ampuh bah

Staf @beritaibanMY
October 18, 2017

KUCHING: Opis Bomba enggau Penyelamat Malaysia (JBPM) Menua Sarawak bisi strategi ke pengabis manah napi ampuh bah besai ti dijangka deka nyadi dalam bulan November tu ila.

Direktor opis nya, Nor Hisham Mohammad madah strategi pengabis manah nya ditetapka nengah pemerat beratika gaya mua hari sereta tikas ai kelebih agi di sitak ke bepeluang napi ampuh bah di Sarawak.

“JPBM Menua (Sarawak) deka ngemata sereta meratika gaya mua hari nengah portal rasmi Opis Meteorologi Malaysia sereta beratika tikas ai nengah iHYDRO Opis Entali Ai Sarawak, kena netapka strategi pengabis manah napi ampuh bah di menua tu.

“Kelebih agi ba sitak ke muntang sereta bepeluang kena ampuh bah sereta sitak ke nerima ujan lebat deka diperatika enggau serius,” ku iya madah lebuh dikerandau kemari.

Iya madah, taja pan bulan November tu ila, dipelabaka deka nyadi ampuh bah besai, JBPM menua seruran besedia enggau semua perenga guna pemisi opis nya nyengkaum kededua unit helicopter opis nya.

Tu ku iya, laban ampuh bah nyadi fenomena ninting taun, lalu ditambah agi enggau gaya mua hari ke pedis endar deka dipadah bakani ku gaya mua hari nya seharitu, pagila, lusa.

Bekait enggau penyendia logistik sereta pengereja pengawa JBPM Sarawak, Nor Hisham madah, semua tu dalam gaya ke manah lalu barang maya besedia ulih dikena.

Iya nandu baru madahka, kediatu JPBM Menua Sarawak nyendiaka urung 56 bot alai ari penyampau nya, 46 bot aluminium, enam bot fiber, tiga bot bansa Kevlar lalu sebuah agi, bot Amfibia (ARIB).

Ari sukut penyendia pengangkut darat ku iya, JBPM menua ngembuan 18 lori (tiga tan enggau lima tan), tiga bas, 71 kerita empat ruda sereta 14 Van Urvan.

“Enti deka beratika pengawa nyelamat ulih digaga enggau silik agi, JPBM Sarawak dibagi ngagai tujuh zon, iya nya Kuching, Samarahan, Sri Aman, sibu, Bintulu, Miri enggau Limbang, ke mungkur urung 29 Palan Bomba enggau Penyelamat (BBP).

“Personel kami deka dibantu ulih 43 raban Bomba Sukarela (PBS) di serata menua enggau pemayuh raban nya manggai urung 2,100,” ku iya.

Iya nandu baru madahka JBPM Sarawak ngembuan urung 1,118 personel di serata menua lalu ari peyampau nya, urung 394 gawa 12 jam lalu urung 590 gawa dalam kandang 24 jam.

Bedau lama tu tadi, Menteri di Opis Menteri Besai, Datuk Seri Dr Shahidan Kassim ba siti aum media madahka Komiti Mutarka Penusah Ngenyit Sarawak (JBPN) bepun ari renggat menua ngagai komuniti dilalau nyikap diri napi ampuh bah besai ti deka nuntung menua tu, bulan baru tu ila.

Shahidan mega madahka nyikap diri empu enggau silik agi mungkur sitak ke enda biasa dituntung penusah ampuh bah.

“Nitih ku Opis Meteorologi, di bulan November tu, dipelabaka ujan lebat bisi nyadi lalu di tambah enggau nya, gaya mua hari pan enda berapa manah.

“Nya alai, Komiti Mutarka Penusah Ngenyit Sarawak enggau Mutarka Penusah Ngenyit renggat komuniti deka nyikap diri empu napi ampuh bah di sitak ke seruran kena ampuh bah sereta ke enda kala napi ampuh bah,” ku iya. #UtusanBorneo