Kabut balat ke nyadi di Miri ngujungka kayu tumbang - Berita Iban Online | Laman Web Berita Kitai

Header Ads

  • Baru Nyadi

    Kabut balat ke nyadi di Miri ngujungka kayu tumbang

    NGEREBA : Raban Bomba muai kayu ti rebah ba mua Opis Polis Trafik Miri.

    MIRI: Kabut balat kenyau ari malam Hari Lima ke udah enda ngetu dataika Hari Enam ngujungka kayu tumbang ba sebengkah endur di mengeri tu.

    Nasit endar nadai sebarang penusah bakal tauka pengerusak besai diripotka nyadi.

    Kaban ari Raban Nyaga Pengelikun Mensia Mayuh Malaysia (APM) enggau Opis Pengerara Api enggau Penyah Penusah (Bomba) udah meresi kandang menua ti kena pangka penusah kenyau ari pagi Hari Enam.

    Entara kandang menua ti diripot napi penusah kayu tumbang iya nya di Lutong, Bakam (semak SK Kampung Bakam), Golden Hill, Prominjaya, ba mua Institut Kemahiran Belia Negara (IKBN Miri), ba mua Opis Polis Trafik Miri.

    Ketuai Bomba Zone 6, Supt Law Poh Kiong madah Bomba Lopeng udah digerah meresi kayu tumbang di IKBN Miri, Prominjaya enggau di Lutong seraya Bomba Miri gawa di kandang menua Bakam, Golden Hill sereta ba mua Opis Polis Trafik Miri.

    Ba lansa bukai, APM Miri bisi dikangau kena malam Hari Enam ngambika muai pun manga ti rebah ninggang perabung rumah di Kampung Luak.

    Pemesai APM Miri, Capt. (PA) Mohd Hazle Shah Abd. Hamid dalam penerang berita dipansutka iya kemari madah raban sida ngesah ngagai penusah nyadi urung pukul 8.08 malam pengudah nerima kangau ngenyit.

    “Raban nya ngena sejam pengelama muai dan kayu ti rebah ari perabung. Sida tembu urung pukul 9.11 malam,” ku iya.

    Kabut balat datai enggau ujan bangat kenyau ari Hari Lima ti ngujungka bah tunggal mangka sekeda genturung pendiau di Miri enggau mega di Bekenu.

    Antara kandang menua kena pangka bah Kampung Subak di Bekenu enggau kem Servis Nasional Sungai Rait ditu.

    “Kelimpah ari nya, jematan Lusut di baruh SK Temenggong Datuk Muip di Taman Tunku runtuh ketegal ai bah,” ku Law.

    Jematan tu udah diketu enda lama ari ditengah ngambika dikemanah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads