Kampus INFRA di Sarawak diperambu tembu Mei 2018 - Berita Iban Online | Laman Web Berita Kitai

Header Ads

  • Baru Nyadi

    Kampus INFRA di Sarawak diperambu tembu Mei 2018

    INFRA KEDUA DI MALAYSIA: Ismail di sempulang Uggah, Alexander enggau Rubiah nunjuk rumah Institut Kemajuan Desa pampang Sarawak.

    KUCHING: Kampus Latih Institut Kemajuan Desa (INFRA) keterubah di Sarawak dipelaba tembu dalam bulan Mei taun baru tu ila.

    Menteri Pemansang Menua Pesisir enggau Kandang Menua, Datuk Seri Ismail Sabri Yaakob madah,projek nya ke digaga enggau ungkus urung RM44.8 juta nya, udah 52 peratus nyauka tembu.

    “Enti palan tu udah tembu ila, Kampus INFRA nya deka nyendiaka perengka guna ke ulih dikena urung 5,737 ketuai pupu raban bansa di nengeri tu, alai sida iya belajar ngambi kus chara nyaga genturung pendiau sereta nyimpan wang,” ku iya.

    Iya madah munyi nya ba aum media, , pengundah mendingka licha pasal projek nya, beserimbai enggau penemuai kereja iya ke Sarawak kemari, di endur projek kampus INFRA, ditu, ensanus.

    Iya nandu baru madahka INFRA nya nyadi palan endur ketuai pupu raban bansa di renggat genturung pendiau ngambi kus, dalam pengawa sida iya ngelatih ketuai pupu bansa ke professional.

    “Bisi empat buah rumah ke berat ke bisi di INFRA, Kota Samarahan tu, iya nya Kompleks Pentadbiran, Dewan Makai, Buding sereta Blok Akademi.

    “Dipelabaka INFRA tu ulih nguan 250 penyereta dalam siti timpuh,” ku iya lalu nandu baru madahka projek nya deka meri empas ngagai orang ke patut di menua tu.

    Ku iya, taja pan projek tu bisi napi pengelaun mimit ketegal penanggul teknikal, iya enda ngachau ungkus projek nya.

    “Enti nitihka atur, projek nya patut tembu dalam bulan Februari 2018, tang ketegal penanggul teknikal, iya laun mimit tembu, iya nya dalam bulan Mei 2018, tang ungkus nya tetap sebaka,” ku iya.

    Kelimpah ari nya, Ismail Sabri madahka opis menteri nya mega benung merambu deka ngaga sebuah agi INFRA di Sabah, lalu ia agi ba renggat dipejuraika begulai enggau Perintah Menua.

    “Naka kediatu, kami semina bisi INFRA di Kuala Lumpur lalu ke di Kota Samarahan tu kedua di Malaysia,” ku iya. Sama bisi enggau ngulu atur pengawa nya kemari, Sapit Kepala Menteri Datuk Amar Douglas Uggah Embas, Sapit Menteri Pemansang Menua Pesisir enggau Kandang Menua, Datuk Alexander nanta Linggi, Kaban Parlimen Kota Samarahan, Rubiah Wang, enggau Direktor INFRA Datuk Rubiah Abdul Rahman. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads