Kes bechara bekaul tanah NCR patut diketu dulu - Berita Iban Online | Laman Web Berita Kitai

Header Ads

  • Baru Nyadi

    Kes bechara bekaul tanah NCR patut diketu dulu

    ALAH BECHARA: Bala TR Nyutan sepengudah nerima pemutus chara ba kort di Kuching, empai lama tu tadi.

    SIBU: Kes becharaka tanah adat Bumiputera (NCR) patut diketuka dulu nyentuk Komiti Pemansik Pulau Galau enggau Pemakai Menua (PMPG) mujur mai asil pansik sida senentang dua iti isu nya.

    Penengkebang Dayak Think-Tank Group (DTTG) Wellie Henry Majang madah, tu dikena nentuka kes chara tanah bansa Dayak ulih diatur enggau engkeman agi.

    “Ke baru nyadi diatu iya nya kes TR Nyutan enggau bala iya ari Kampung Lebor, Serian ti alah bechara ngelaban sebengkah kompeni.

    “Ba Kort Besai enggau Kort Ngapil, sida ulih menang ba kes tu laban dua bengkah kort tu ngatur chara nya bepanggai ba penerang (bukti) ke nyengala dipeda enggau sejarah.

    “Nya alai, kitai andal amat perintah nengeri berunding dulu, ngetuka nama-nama chara tanah bansa Dayak nyentukka Komiti PMPG mantaika asil pansik sida iya ke diatu udah semilan bulan dipejalaika,” pia ku iya madah ngagai pengarang berita, kemari.

    Wellie madah, kelimpah ari kes ke nyadi ba TR Nyutan, bansa Dayak udah alah bepuluh iti kes bechara tanah kenyau ari bulan Julai tu tadi.

    “Ke ditemu kitai, diatu agi bisi urung 400 iti kes enggi beribu iku ruang bilik mengkang empai temu pemutus bechara.

    “Tu tau bendar nejuka bansa Dayak nyau enda berasai andal agi dipegai perintah nengeri ba pekara bekaul enggau pengelikun sereta pengelantang pengidup taja endang bebendar nyukung perintah ngelama tu,” ku iya madah baru.

    Ketegal pekara nya, seraya ke nganti pemutus pansik Komiti PMPG, Wellie andal amat pemesai Dayak ba rintai perintah nengeri ulih mai pekara nya ngagai Kepala Menteri ngambi ngetuka dulu kes bechara tanah NCR bansa Dayak.

    Kena 13 Oktober tu tadi, Tuai Rumah Nyutan Jami, Gangak Guma enggau Langa Kama ari Kampung Lebor, Jalai Gedong, Serian lenyau tanah NCR sida sepengudah Kort Besai ngaga pemutus alai Kort Tinggi enda ulih ngaduka baru hak ngempu tanah ari kena pajak ti udah diberi sebedau tu.

    Pemutus chara nya nentuka sida tiga (responden) nadai pilih bukai kelimpah nerima pampas aja. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads