Kes Betty Kuleh muai anak patut nyadika teladan, ku Fatimah - Berita Iban Online | Laman Web Berita Kitai

Header Ads

  • Baru Nyadi

    Kes Betty Kuleh muai anak patut nyadika teladan, ku Fatimah

    Dato Sri Fatimah Abdullah
    KUCHING: Kes seiku nembiak indu, Betty Kuleh, 24, ke muai anak baru ada patut nyadi teladan ngagai semua, ku Menteri Pengintu Pengelantang, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah.

    Ku iya, perintah enda meransang tang enti bisi kes nembiak indu ke betubuh bisi sebedau jadi, sida patut ngenataika penanggul sida ngagai ejensi ke udah disedia.

    “Kitai enda meransang nembiak indu betubuh dua sebedau jadi. Tajapia kitai deka madah ulah muai anak baru ada seiti penyalah besai lalu deka diukum jil.

    “Sida patut enda ngereja semua penyalah nya. Perintah bisi nyendia palan ‘Taman Sri Putri’ endur sida ngintu kandung nyentukka beranak,” ku iya.

    Fatimah mansutka jaku nya ba seiti aum pengarang berita ke diatur di Komplek Baitulmakmur ditu, kemari.

    Iya mega madahka perintah mega bisi nyendia ‘Rumah Kanak-Kanank’ endur ngintu anak mit ke baru ada.

    Ngenang sentang kes Betty, iya madah nembiak indu nya ke mega seiku nembiak ke benung belajar ba sebuah palan pelajar pribit ditu deka disaup ngambi ulih nembuka pelajar renggat diploma iya.

    Ku Fatimah nambah, Betty disadang nembuka ukum jil enam bulan pengudah tuduh iya ditukar ari Seksyen 302 ngagai Seksyen 318 Penal kod.

    Ba pechara kena 20 Oktober tu tadi ku Fatimah, Kort Tinggi mutuska Betty salah nengah Seksyen 318 Penal Kod.

    Betty ke ngakun salah diukum enam bulan jil ari maya iya ditan iya nya ba bulan April tu tadi.

    Betty dituduh muai anak baru ada di sebuah flat di Samajaya kena 11 April 2017 urung pukul 6 pagi.

    Tubuh anak mit ke enda beseput agi nya ditemu seiku orang dalam seiti kutak ba endur muai uras urung pukul 10.30 pagi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads