Ketuai komuniti patut nerima penemu nembiak redak - Berita Iban Online | Laman Web Berita Kitai

Header Ads

  • Baru Nyadi

    Ketuai komuniti patut nerima penemu nembiak redak

    TEPA PENGINGAT: Tuai Rumah Aing Mancha (tiga kanan) nyuaka tepa ngagai Masir (tiga kiba) seraya dikemata Peter (kiba) sereta ke bukai rambau pengerami nya.

    SIMUNJAN: Ketuai komuniti di nengeri tu patut ngembuan runding ti ulih nerima semua penemu lalu seruran sedia ningaka buah runding nembiak redak sida, ku Sapit Menteri Dalam Menua II Dato’ Masir Kujat.

    Ku iya, ketuai komuniti enda patut ngeringka penemu iya siku aja tang meseti ninga penemu tauka buah runding ari nembiak redak sida.

    “Tu ukai reti nya penemu ketuai komuniti enda dikemerat tauka enda diguna. Buah runding nembiak redak nyangka ulih ngemesaika sekeda skop randau tauka nambahka tikas pemanah pejalai langkar projek ke digaga,” ku iya.

    “Ketuai ti pintar iya nya ketuai ti ulih nerima sereta ninga buah runding orang bukai. Anang kelalu bingking deka ngena penemu diri empu aja laban penyerakup ti nyadi pemun ngagai penyulut,” ku iya.

    Iya ke mega Kaban Parlimen (MP) Sri Aman madah munyi nya lebuh ti bejaku bejadika Pengerami Pemesai Begulai Enggau Rayat diatur enggau Komiti Pemansang enggau Pengelikun Genturung Pendiau (JKKK) Kampung Mawang Ai ti bepalan ba Rumah Aing Mancha, Simunjan ditu bedau lama.

    Ku Masir, nyema ketuai komuniti ngemeranka chara ti ulih nerima penemu orang bukai, udah tentu JKKK di tetiap genturung pendiau ba nengeri tu nyadi tegut agi.

    “Berindik ari nya, kitai ngarapka tetiap ketuai komuniti baka ketuai JKKK nyeliahka runding ti angkun kediri empu aja,” ku iya nambah.

    Kelimpah ari nya, Masir ngansak kaban JKKK mega mantu perintah sama ngemunaska penyalah rama ti nyadi ba raban nembiak ti naka ke diatu makin balat nyadi.

    “JKKK patut begulai enggau perintah nyeliah raban nya ari ngaul diri dalam penyalah rama baka nginsap, nginsap gam, gian dadah sereta ke bukai.

    “Anang nejuka penanggul tu baka nya aja ti ngaul raban nembiak rebak baru. Kitai semua patut bekerejasama dikena nempa sida ti nyadi penyambung ketuai menua jemah ila,” ku iya nandu.

    Entara chara ke ulih digaga JKKK iya nya narit minat raban nembiak nyereta aktiviti ti menyana ti pulaika pemaik.

    “JKKK ngaga aktiviti ninting taun. Enda salah nyema sida ngaga program ti ulih narit raban nembiak ngambika sama nyereta.

    “Raban nya ngembuan pengingin ti tinggi, lalu embing sereta peransang ke betul endang patut ngambika sida enda ngaul pengawa ke enda menuku,” ku iya nyemetak.

    Sama bisi datai ba pengerami nya Pemancha Peter Moni sereta ketuai komuniti ke bukai.

    Ba pengerami nya, Masir mega udah ngemendarka agih belanja spepnyampau RM5,000 ungkup JKKK Rumah Aing, RM5,000 agi ungkup Gerempung Indu lalu RM20,000 dikena ngemanah atap rumah panjai nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads