Header Ads

  • Baru Nyadi

    KPTM, UPM, MPB nempa kerejasama ngangkatka asil pemansut lada

    KEREJASAMA: Aini enggau Harry betukar dokumen MoU ke udah disain, kelai besaup dalam projek pemansik Sarawak Pepper Farm @UPM Bintulu, seraya diperatika Idris (tengah). -Gambar Muhd Rais Sanusi

    KUCHING: Opis Menteri Pelajar Tinggi Malaysia (KPTM) nengah Universiti Putra Malaysia (UPM) Kampus Bintulu nempa kerejasama strategik enggau Lembaga Lada Malaysia (MPB) enggau juluk deka nambahka pemayuh asil lada Sarawak.

    Mandal Canselor, Universiti Putra Malaysia (UPM) Prof. Datin Paduka Dr. Aini Ideris madah, kerejasama nya dipejalaika nengah projek mansik Sarawak Pepper Farm @UPM Bintulu.

    Nitih ku iya, projek pansik Sarawak Pepper Farm @UPM Bintulu kerejasama strategik entara tiga piak iya nya UPM (KPTM), Opis Menteri Pelajar, Sains, Pemansik Teknologi Sarawak sereta MPB enggau juluk deka ngangkatka asil pemansut lada di Sarawak kelebih agi Malaysia.

    “Aku temegah ati laban projek Sarawak Pepper Farm @UPM Bintulu tu udah narit ati KPTM lalu meri belanja sepenyampau RM1 juta dikena ngepunka projek tu.

    “Kerejasama strategik tu deka ngemansangka 25 ekar tanah ba UPM Kampus Bintulu ti dipejalaika bererenggat, berengkah bulan Oktober 2017.

    “Palan mansik lada ti deka dikemansangka ba UPM Kampus Bintulu tu dikearapka ulih nyerungkai penanggul besai ke benung ditapi industri tu baka pun lada ti kurang produktif tauka kurang ngeluarka asil, tuat lada ti mar baka kayu tebelian, rega lada ti enda meruan enggau kurang penyereta ari raban biak ngemajakka industri tu,” ku iya.

    Iya mansutka pekara nya dalam jaku pengelalu ‘Majlis Pelancaran Penyelidikan Translasional: Projek Penyelidikan Lada Sarawak dan Pembangunan Ladang Penyelidikan & Komuniti di Ladang’ UPM Kampus Bintulu, ke diatur ba sebuah hotel ditu lemai kemari.

    “Projek nya dibagi ngagai tiga program besai iya nya 5 ekar ungkup program pansik, 15 ekar (program ngeluar nengah chara komersial) enggau 5 ekar agi dikena bejalaika Program Ladang Komuniti.

    “Lalu, 4 pekara besai dalam program pemansik ke deka dipejalaika iya nya Program Nanam Lada, Program Ngintu Lada, Program ‘Teknologi Hiliran’ enggau Program ‘Dimensi Kemanusiaan’ ti deka dipejalaika raban pemansik UPM enggau Opis Lada Malaysia,” ku iya.

    Bejaku baru iya madahka kebun besai lada nya deka dikemansang ngena chara ngemeran sereta ngemeratka chara nanam ti manah sereta ungkup timpuh panjai, dipelabaka deka narit ati pekebun lada, orang dagang, saintis, pemeranak puku enggau nembiak.

    “Kami pechaya projek tu nyamin penegap penanam lada chelum di Malaysia seraya nyukung juluk menua deka nambahka pemesai kebun ari 14,000 hektar ngagai 20,000 hektar lebuh manggai ba taun 2020, lalu menua nyadi pengeluar besai lada chelum dunya,” ku iya.

    Berebak enggau tu iya meri puji sereta terima kasih ngagai Opis Menteri Pelajar, Sains enggau Pemansik Teknologi enggau MPB laban ti besaup ngemujurka singkang keterubah projek nya.

    Nyerumba pengerami nya kemari, UPM ti diarika Aini nyain sempekat pemereti ati (MoU) enggau MPB ti diarika Ketuai Direktor MPB Dr. Harry Entabang, ti deka nempa kerejasama dalam projek nya, seraya dikemataka Menteri Pelajar Tinggi Malaysia Datuk Seri Idris Jusuh lalu disempulang Menteri Muda Pelajar enggau Pemansik Teknologi Dr. Annuar Rapaee.

    Sama bisi datai ngagai pengerami nya kemari Sapit Menteri Pelajar tinggi Malaysia Datuk Mary Yap Kain Ching, Ketuai Direktor Pelajar Tinggi Datin Paduka Ir. Dr. Siti Hamsiah Tapsir enggau ke bukai sereta urung 400 iku pekebun lada ke diau ngelingi Kuching, ari Bau, Serian enggau Lundu. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads