LKIM: Sebengkah komiti patut ditumbuh - Berita Iban Online | Laman Web Berita Kitai

Header Ads

  • Baru Nyadi

    LKIM: Sebengkah komiti patut ditumbuh

    KOTA SAMARAHAN: Opis Pemansang Berikan Malaysia (LKIM) meri penemu ngambika sebengkah komiti khas ditumbuhka di menua tu dikena napi penanggul orang berikan ari menua luar ke enchuri ikan ba tasik Malaysia.

    Perambu nya dibantaika Chairman LKIM Datuk Seri Dr Irmohizam Ibrahim, nyerumba penemuai iya enggau bala LKIM ngagai Palan Penyangkai Orang Berikan LKIM Tanjung Bako ditu, kemari.

    Iya bepenemu komiti nya ti ngemata elemen penerit adat tauka undang-undang kelebih agi meri penerang enggau bekunsi perengka ke patut dipasuk semua ejensi penerit adat ti bekaul.

    “Aku deka meri penemu ngagai perintah ngambika numbuhka sebengkah komiti khas, lalu kitai merambuka komiti nya bechairmanka YAB Sapit Menteri Besai (Datuk Seri Dr Ahmad Zahid Hamidi).

    “Laban aku suah ninga sereta sebana ari orang berikan kelebih agi di Pantai Timur Semenanjung sereta Sabah enggau Sarawak pasal orang berikan ari menua luar ke ngulihka asil ikan nadai pemendar kelebih agi ba tasik kandang pantai Timur Malaysia.

    “Nya alai amat beguna mega numbuhka elemen NBOS antara semua ejensi penerit adat ke bisi nyengkaum polis marin, APM, TLDM, Opis Berikan,LKIM, Imigresyen enggau ke bukai ti bekaul,” ku iya.

    Iya mansutka pekara nya lebuh dipinta meri timbal bekaul enggau isu pengerugi menua urung RM3 billion ngagai RM6 billion asil tasik ketegal orang berikan ari menua luar ke bisi berikan enggau nadai pemendar ke tasik Malaysia.

    “Tu ngayanka kitai nadai agi bekompromi engau elemen orang berikan menua luar ke baka enchuri ikan ari tasik Malaysia,” ku iya lebuh dikerandau raban pengarang berita pasal pekara nya.

    Bekaul enggau pekara nya, iya melabaka dalam Bajet 2018 ke dibantaika 27 Oktober tu ila, Menteri Besai Datuk Seri Najib Tun Razak dipelaba nambahka aset soldadu kelebih agi aset soldadu tasik Malaysia (TLDM).

    Bepelasarka pengerugi menua RM3 billion ngagai RM6 billion ku iya, ti nyadi pengari simpan TLDM, udah datai ba maya iya aset TLDM ditambah dikena ngenegapka elemen penerit adat tauka atur ba tasik antarabansa Malaysia.

    “Tu amat beguna dikena meri penegap runding ngagai orang berikan menua tu awakka ulih nambahka penatai pemisi lalu kedua, pengeraja tauka pengawa kitai ba ikan tu nyadi penyungkak ekonomi sereta ikan menua terus nambah,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads