Header Ads

  • Baru Nyadi

    Nyau deka selampur rumah panjai di Engkilili udah disambung karan

    DIPENYADI : Dr Rayong seduai Nyalau ngetas riben bejadi kuasa karan 24 jam sereta Biro Indu Rumah Jangin Sarie, Kejemut, Lidong kemari.

    SKRANG: Kaban Kunsil Nengeri (ADUN) Engkilili nyadaka pengaga ati beratika nyau deka selampur rumah panjai sereta tumpuk pendiau ba sitak tu udah disambung karan 24 jam.

    “Diatu, tiga kandang menua iya nya Kejemut, Tabut enggau Tembung udah disambung enggau BELB lalu semina tinggal Tebarong aja bedau ulih sambung laban penanggul ba tanah ke dipansa tali karan,” ku iya.

    “Diatu kitai semina betapi enggau penanggul bekal ai beresi tang aku udah bisi belanja ti chukup, semina tinggal bejalaika pengawa aja,” ku iya rambau pengawa Ngelanchar Bekal Elekterik Menua Pesisir (BELB) sereta Stor Biro Indu Rumah Jangin seraya madah diatu semua rumah panjai di sepemanjai Skrang Ili nyengkaum Lidong udah ngasaika bekal kuasa karan 24 jam.

    Nangkan nya, ku iya pemansang ti dibai seriris enggau juluk enggau tuju Kepala Menteri Datuk Patinggi Tan Sri Abang Johari Tun Openg ti dekaka pemansang, kelebih agi di menua pesisir jampat agi dipejalai.

    “Tu mega dikena nampung pengawa ditinggalka niang Tok Nan ti dekaka bida takah kelebih agi ba sukut pemansang infrastruktur mengeri enggau menua pesisir disemak ngambika semua rayat Sarawak ulih ngasaika asil pemansang di baruh perintah Barisan Nasional (BN),” ku iya.

    Berindik ari nya, Dr Rayong dekaka rayat terus nyukung BN di baruh pegai ketuai baru, Abang Johori, ti balat beratka tetiap penanggul ditapi peranak Sarawak.

    “Taja agi baru, tang gaya nyadi ketuai enggau chara iya ngatur pengawa endang sikar, bisi juluk sereta ngengkahka pemerat nengeri ba endur pemadu tinggi,” ku iya kelebih agi ba pengawa niri negika hak nengeri tu ba perintah Besai.

    Ku iya, rayat patut nangkup peminta Abang Johari ti deka meda semua rayat bepenatai pemisi tinggi, abis nadai RM4,000 sebulan datai ba taun 2030 enggau berimbaka tanah sida.

    “Nya kebuah aku meransang semua tuai rumah di DUN tu numbuhka Biro Ekonomi ti deka megai pangku pengawa ngiga enggau nyerungkai bidang betanam betupi ngambika dikereja di tanah adat sida empu,” ku iya.

    Ku iya, anang ngandal sebansa aja utai tanam dikena mansi rega komoditi ti nurun niki kelimpah patut dikereja chara dandang besai ngambika ulih dieksport ngagai makit luar.

    Ba pengerami nya, urung 21 pintu bilik peranak Rumah Panjai Jengin Sarie, Kejemut, Lidong diatu berasai lantang pengudah bekal kuasa karan 24 jam ulih diasaika sida kenyau empat hari ke udah.

    Tuai Rumah Jengin Sarie lebuhka dirandau enda balalaika pengagit enggau pengaga diri. Iya ngarika sida serumah meri besai terima kasih ngagai perintah laban juluk deka meda rumah panjai sida disambung kuasa karan udah dijapai.

    “Nyau enda berasai ai mata labuh laban umur nyau manggai diatu baru ulih ngasaika bekal kuasa karan 24 jam lalu asaika bemimpi aku meda pengawa bejadika (projek pemansang) nya tadi,” ku iya.

    “Nya alai aku ngarika kami serumah beterima kasih ngagai perintah ti udah ngagihka belanja bejuta ringgit dikena nyambung karan tu.”

    Ku iya, semua tu asil ari pengepuh Kaban Kunsil Nengeri (ADUN) Engkilili Dr Johnical Rayong Ngipa gawa nadai ngira jam nentuka bekal kuasa karan nya disambung.

    “Enti nadai iya tentu kami agi nganti sereta agi ngena injin api ngulihka bekal kuasa karan,” ku iya seraya nampung, pemanah pengawa Dr Rayong enggau Kaban Parlimen (MP) Lubok Antu Datuk William Nyalau ngemuntangka pelin pemansang di DUN Engkilili.

    Berebak enggau nya, Dr Rayong bisi ngemendarka pemeri geran MRP ngagai Kaban Komiti Pemansang enggau Pengelikun Genturung Pendiau (JKKK) enggau Biro Indu Rumah Jangin penyampau RM7,000 enggau RM5,000. Seraya Nyalau mega ngagihka RM5,000 enggau RM3,000.

    Nyadika tambah, Dr Rayong ngemendarka belanja penyampau RM250,000 dikena ngaga jematan gantung ti deka dikena peranak besemak Rumah Jangin ke seberai sungai Skrang Ili. Kereja ngaga jematan deka dipejalai pengudah belanja diberi dalam taun baru.

    Sama bisi datai MP Lubok Antu Datuk William Nyalau Badak, bala pengari opis perintaj, pengari ari parti komponen BN, bala kaunsilor, tuai rumah sereta lebih 500 iku temuai ke datai ari kandang besemak menua Lidong, Skrang Ili, Tabut, Lipat enggau Kubal. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads