Header Ads

  • Baru Nyadi

    Orang berikan ti nyangkaika asil ba Palan Penyangkai Tanjung Bako deka diberi insentif

    KOTA SAMARAHAN: Orang berikan ti nyangkaika asil ikan ba palan penyangkai ikan diri empu, enda diberi insentif ari perintah.

    Chairman Opis Pemansang Ikan Malaysia (LKIM), Datuk Seri Dr Irmohizam Ibrahim madah, insentif nya semina diberi ngagai orang berikan di mengeri Kuching sereta ke ngelingi Tanjung Bako ke nyangkaika asil ba palan penyangkai ke udah ditetapka baka Palan Penyangkai Orang Berikan LKIM Tanjung Bako.

    “Ditu aku deka madahka semua bot ti nyangkaika ikan ba Palan Penyangkai Orang Berikan Tanjung Bako, C2 deka diberi insentif 20 sen sekilogram ikan lalu ungkup C sereta ke baruh deka bulih insentif 10 sen sekilogram ikan.

    “Atur tu semina dipejalaika ba Palan Penyangkai Orang Berikan LKIM Tanjung Bako tu, laban insentif tu deka diberi maya sida nyangkaika ikan ditu.

    “Tu dikena ngenyakahka agi pengawa kitai deka nyangkaika ikan ditu seraya deka nyadika tu palan penyakai ke ulih nyimpan bekal ikan baru ngambika ila ulih nyendiaka bekal protien ke menua,” ku iya lebuh dikerandau raban pengarang berita, kemari.

    Dulu ari nya iya ngabas tikas penembu projek ngaga Palan Penyangkai Orang Berikan LKIM Tanjung Bako di disempulang bala LKIM, pemesai lopis LKIM enggau ke bukai.

    Nambahka nya, iya madahka insentif nya mega dikena meransang ngambika mayuh agi orang berikan ngena palan penyangkai ikan ti pemadu besai di Malaysia sereta di Asia Tenggara, ke disikap ngena keraban ke chukup.

    Nitih ku iya mega, Opis Menteri Dagang Dalam Negeri, Koperasi dan Pekara Bebeli Barang udah ngemendarka ngena stesyen minyak khas endur ngambi diesel kelimpah ari deka nyendiaka kilang ais ti digaga ba renggat kedua, ungkup orang berikan di mengeri Kuching sereta kandang Tanjung Bako.

    Iya madahka LKIM mega deka berandau enggai ejensi ti bekaul, dikena nyeliahka palan penyangkai nya ke disema baka ‘gajah putih’.

    Ku iya, ke pemadu beguna Palan Penyangkai Orang Berikan LKIM Tanjung Bako deka nyadi seiti ikon kelebih agi ke nengeri Sarawak sereta orang berikan ke bisi di serata nengeri kelimpah ari ngangkatka industri berikan, rantau asia tenggara enggau kelebih agi Tanjung Bako.

    “Aku ke nyadi Chairman LKIM puas ati meda pemansang pengawa ngaga Palan Penyangkai Orang Berikan LKIM Tanjung Bako.

    “Udah tu ila kitai deka meda baka ni penyangkai tu nyadi palan ke chukup aktif lalu udah tentu Palan Penyangkai Orang Berikan LKIM Tanjung Bako tu dipejalaika Gerempung Berikan Negeri Sarawak sereta dipatau begulai enggau LKIM.

    “Aku melabaka dalam timpuh sebulan agi, kitai ulih meda bisi ubah berengkah ari sehari tu,” ku iya seraya madahka penemuai iya ngagai LKIM nya mega ngayanka komitmen ngagai palan penyakai nya ke nyauka tembu 100 peratus. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads