Header Ads

  • Baru Nyadi

    Orang ti nyadi presiden SABERKAS patut chukup latih, mayuh peneleba

    SEPENEMU: Penyereta SABERKAS ari serata menua Sarawak sama enggau ngulu TGM SABERKAS ke-15 ditu, kemari.

    KUCHING: Kepala Menteri Datuk Patinggi Abang Johari Tun Openg madah enti udah datai maya alai iya patut ngetu mangku pengawa nyadi presiden SABERKAS (Gerempung Serakup Nembiak Sarawak) sereta Kepala Menteri, iya betatika orang ke deka nganti iya ila enda tau enda orang ke udah chukup latih sereta ngembuan mayuh peneleba.

    Pengawa ngelatih benung dipejalai, laban Sarawak beguna amat ke orang ti bepengelandik, tim baru, sereta ulih bejalaika ngiring Sarawak ngagai tikas ke lebih tinggi.

    “Kitai deka majak belajar, kitai deka ngetanka sosioadat kitai ke bisi di menua tu sereta adat sayauka menua sereta gawa enggau penapat iya ke menua tu.

    “Manggai umur 50 iya nya umur ke chukup alai kitai matak diri lalu meri peluang ngagai sida ke biak agi nampung pengawa.

    Enti nitih, udah manggai umur 60 taun, kitai patut udah belelak sereta ngembuan pendiau ke lantang,” ku Abang Johari.

    Iya madah munyi nya lebuh bejaku ngepunka Aum Tiga Taun Sekali SABERKAS ke-15 ti diatur ba sebengkah hotel ditu kemari, sereta digulu urung 3,000 pesereta, pemesai sereta komiti SABERKAS ari selampur menua Sarawak.

    Iya madahka, enti timpuh maya nya (badu agi mangku pengawa) udah datai, pemesai kediatu enda tau enda udah ngelatih sereta meri penemu ke chukup ngagai sida ke biak.

    “Maya kitai badu pan, patut digaga sereta dipejalai enggau manah, sereta sida ke biak agi ulih nganti kitai mangku pengawa kitai, kitai pan bisi hari belelak sereta diau dalam pendiau ke lantang.

    “Lebuh utai nya nyadi, bisi penampung, enti kitai ngembuan adat ke manah.

    Nya alai, dalam konteks SABERKAS, gaya sesiku tuai pemesai bejalaika pengawa sida iya enda sebaka, nimbal ngagai gaya tekala nya.

    “Tuai pemesai enda tau enda nitihka idar jeman, ukai reti kitai ke udah tuai tu enda ulih agi nitih chara sida ke nembiak, tang kitai ke tuai tu meh ke patut ngelatih bala nembiak.

    “Sebedau aku ngetu mangku pengawa aku (nyadi presiden SABERKAS tauka Kepala Menteri), rebak baru tu ke patut dilatih enggau chukup.

    Laban (ambika chunto) nyadi Kepala Menteri tu ukai semina ke Sarawak aja, tang kitai enda tau enda (adil) ngagai semua komuniti, semua pengarap …,” ku iya.

    Abang Johari ti mega nyadi Menteri Wang enggau Perambu Ekonomi Menua meri terima kasih ngagai penyereta sereta tuai pemesai SABERKAS ke agi mengkang begunaka iya betuaika SABERKAS.

    “Pengelama aku ngiring ngembing SABERKAS ari pangku pengawa Sapit Presiden datai ngagai presiden, sereta berapa iti program ke udah digaga SABERKAS, aku ngarapka iya meri penguntung ngagai komuniti nembiak 45 taun tu ke udah datai ke diatu,” ku iya lalu nandu baru madahka SABERKAS diatu udah manggai umur 45 taun.

    Iya nyerumba (ketuai) ninting taun mega udah nyapai renggat ke tuai tang (letuai patut betukar ganti, ku iya.

    “Pemerat iya nya enda tau enda bisi penyambung dalam pengawa nyadi ketuai, lalu dalam timpuh ke sama mega, kitai nyaga adat kitai lalu bakani ku kitai ngemutarka rebak baru kitai, lalu beratika sida iya bakani ku sida iya sama tau enggau ngemansangka Sarawak.

    “Penampung pengawa ketuai berat ba kitai, nyambung pengawa kitai mantu komuniti sereta ngubah komuniti sereta menua kitai.

    Pemerat bansa tu ke manah ba adat SABERKAS, laban kitai meri peluang sereta ngelatih raban kitai,” ku iya.

    Ba lansa bukai, iya madah dalam timppuh 45 taun, SABERKAS udah mujur ngetanka gerempung nya nyadi sebuah pelasar dikena nempa pemansang ke nyadi di Sarawak, ku iya.

    “Sepemanjai 45 taun, kitai udah ngasaika peneleba ke berat, ke berubah-ubah, 45 taun mega kitai napi mayuh krisis baka krisis wang, gaya menua kitai ke baru deka mansang, lalu nangkan nya keruga ari luar ke bisi empas ba (ketuai) menua.

    “Tang Saberkas agi relevan, tu pekara ke berat ke enda tau enda diperatika dalam kitai deka nyerakupka komuniti nembiak kitai.

    Lebuh kitai deka bekunsika bakani ku kitai deka ngemansangka menua kitai, ngambi kirai semua puu bansa sereta pengarap, menua kitai likun, nya pemungkal pemerat kitai,” ku iya.

    Abang Johari ti mega nyadi Menteri Pemansang Nengeri enggau Pengeraja Asal nandu baru madahka, ari (ketuai) kelia dataika ke diatu, kitai betatika pemerat tiap pupu bansa etnik kitai, ke ngujungka SABERKAS nadai napi penemu ke kelalu endar tauka ekstrim.

    “Kitai orang ke umbas iya baika nya orang Islam, Kristian, Budha….

    Kitai agi ulih nelap ba tikas ke pemdau tinggi, lalu nya ke dikembuan sereta udah dikemansangka ulih SABERKAS,” ku iya, ke muji SABERKAS mega mujur numbuhka eko-sistem bansa nya.

    Abang Johari mega ngelalau raban SABERKAS enda tau enda ngubah sida iya empu nitihka idar dunya baka kemaya hari tu, kelebih agi Revolusi ke-4, iya nya jeman digital.

    “Tu ke dikumbai Revolusi ke-4, teknologi udah berubah, gaya pendiau kitai pan udah berubah, semua bepanggai ba sensor sereta teknologi autonomous, iya nya siti teknologi ke pandai.

    “Baik nya Sarawak meri kelala pasal ‘Bitcoin?’ Reti nya, nembiak kemaya hari tu, udah nemu, udah moden, sida iya pan nemu pasal ‘Crypto Currency’, nemu pasal ‘Bitcoin’, bakani ku pejalai Bitcoin nya ari sukut teknologi sereta ekonomi.

    “Reti nya nembiak kemaya hari tu udah nemu dulu agi, nya kebuah ketuai enda tau enda dulu agi ari bala nembiak kitai.

    Enti tuai pemesai enda nemu pasal pekara nya, sapa ke nitih, sapa ke nyadi ketuai? Enti orang nya patut nyadi ketuai, sereta enda nemu pasal pekara nya, lalu lebuh ditanya ulih orang bukai, lalu kitai ke nyadi ketuai tu enda nemu nyaut, reti nya kitai tu ukai ketuai,” ku iya.

    Nyadi seikut ketuai enda tau enda nemu, nyadi ketuai ngiring ngembing orang bukai, ketuai enda tau enda bisi visyen, nya kebuah kitai bisi visyen deka ngubah Sarawak nyadi Sarawak ke pintar, ku iya.

    “Dalam eko-sistem kediatu, pengawa SABERKAS nyadi katalis, kaban sereta ketuai SABERKAS mesti nemu pasal pekara tu, lalu sida iya mega patut ulih berubah,” ku iya.

    Sama bisi ngulu aum TGM nya kemari, Sapit Kepala Menteri Datuk Amar Douglas Uggah Embas ti mega nyadi ex-sapit presiden SABERKAS, Sapit Presiden SABERKAS, Datuk Roland Sagah, Sapit Mandal Presiden SABERKAS, Datuk Abdul Karim Rahman Hamzah enggau Sharifah Hasidah Sayeed Aman Ghazali, Sekretari Besai SABERKAS Dr. Abdul Rahman Junaidi sereta tuai pemesai bukai. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads