Pakatan Harapan udah bebagi penuduk chalun bediri ba Utara Sarawak - Berita Iban Online | Laman Web Berita Kitai

Header Ads

  • Baru Nyadi

    Pakatan Harapan udah bebagi penuduk chalun bediri ba Utara Sarawak

    YB Baru Bian
    MIRI: Parti Keadilan Rakyat (PKR) deka bediri di Limbang, Miri enggau Baram seraya Parti Tindakan Demokratik (DAP) bediri di Lawas enggau Bintulu ungkup kandang menua Utara Sarawak.

    Chairman PKR Sarawak, Baru Bian madah, sida nitihka sempekat Pakatan Harapan (PH) rambau Pengawa Bepilih Besai Ke-13 (PRU13) lalu atur meruan baka selama.

    “Kami bisi sekeda chalun ditaga ulih menang ungkup penuduk Limbang, Baram enggau Miri lalu kami nyerah ngagai pemutus parti sapa bagi ti deka dipilih ba penuduk tu,” ku Baru lebuhka dirandau kemari.

    Nitih ku Baru, ungkup penuduk Miri udah dikemendar rambau atur pengerami makai lemai apin lama ke udah diatur di Eastwood Valley and Country Club ke alai PKR deka bediri ba penuduk di baruh PH.

    Ku iya, ba penuduk Parlimen Lawas, sida nyerah ngagai DAP ngambika ngelala chalun ti ulih menang bediri ngelaban penyandang Datu Henry Sum Agong ari PBB.

    Ngelansa pasal penuduk Limbang ke alai Baru bediri rambau PRU13 suba ngelaban Hasbi Habibollah, ku iya, tejuka aja ngagai pemutus, nyema iya bediri tauka enda ba penuduk nya.

    “Kitai nganti aja enti sema bala ketuai tetinggi milih iya baru tauka nyabung chalun baru dia,” ku iya nampung.

    Ba penuduk Baram, Dennis Engan sekali agi dipilih nyadi chalun PKR bediri maya PRU14 ti deka datai.

    Ungkup penuduk Miri, penyandang Dr Teo Yu Keng dipeda chakah bekimpin ngagai peranak di Miri enggau kandang menua ngelingi iya.

    Iya dipeda bisi meri bantu ngagai sida ti tasah angus, raban orang seranta di Miri.

    Ba lansa bukai, rambau PRU13, penuduk P219 Miri udah meda Dr Michael Teo Yu Keng (PKR) menang enggau majoriti 1, 992 undi ngalahka Tan Sri Peter Chin Fah Kui (SUPP).

    Teo bulih 26, 909 undi seraya Peter Chin 24, 917 undi, lalu chalun STAR, Chong Kon Fatt semina bulih 306 undi aja.

    Ba penuduk Baram, Anyi Ngau (SPDP) menang enggau majoriti mit 194 undi ngalahka Roland Engan (PKR).

    Anyi nerima 9,182 undi seraya Roland 8, 988 undi lalu chalun ngatika diri, Patrick Sibat Sujang 363 undi.

    Penuduk Limbang, Hasbi Habibollah menang majoriti 8,301 undi ngelaban Chairman PKR, Baru Bian.

    Hasbi teulihka 12, 999 undi seraya Baru 4, 698 undi.

    Di penuduk Lawas, Datuk Henry Sum Agong ari PBB menang enggau majoriti 6, 030 undi ngelaban Dr Bob Baru Langup (DAP).

    Datuk Henry bulih 9, 928 undi seraya Dr Bob 3, 898 undi sereta chalun STAR Alirahman Kamseh bulih 69 undi.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads