Header Ads

  • Baru Nyadi

    Penumbuh KPDNKK FOK ulih jampat mutarka isu

    BEJADI : Hamzah (empat kiba) bejadika Program Roadshow Pekara Bebeli Barang enggau Pengawa Dagang sereta FOK Renggat Nengeri Sarawak di Uma Balui Ukap di Skim Pengentap Baru Pendiau Sungai Asap Koyan, Belaga, ensanus.

    BINTULU: Pengawa numbuhka Friends of Menteri Dagang Dalam Menua, Koperasi enggau Orang Bebelika Barang (KPDNKK) (FOK) deka nentuka tetiap kaban iya ulih nyadi mata enggau pending opis menteri nya mutarka isu pedagang ti ngereja penyalah enggau jampat, pia ku Menteri KPDNKK, Dato’ Seri Hamzah Zainudin.

    Ku iya, nengah FOK ti dipejalaika Bagi Pengatur Pekara Penguna KPDNKK Sarawak enggau kerejasama ari Skuad SMART Pengguna 1Malaysia tu deka nentuka tetiap kaban iya ulih tetemuka sebarang aktiviti ti salah dikereja pedagang ti nadai tanggtungpengawa, ngambika atur ti patut dipejalai.

    “Reti aktiviti salah ti disebut kitai iya nya pengawa sekeda pedagang ti natak bekal, nyual barang rega dijaga ngelui ari rega ti ditetap, ngelalaika barang ti dijual, ngemai tama barang belalai sereta aktiviti ke bukai ti ngelanggar atur ti udah ditetapka perintah ukai semina salah ba undang-undang, tang mega ngerugika pengguna sereta ngeruga pengerembai ekonomi menua,” ku iya.

    Iya mansutka jaku tu rambau ngelanchar Pengawa Bejadi Program Roadshow Pekara Bebeli Barang enggau Pengawa Dagang sereta Nyuaka Surat Chiri Pengatur Penguna Parlimen (PPP) Sarawak ti diatur di Uma Balui Ukap di Skim Pengentap Baru Pendiau Sungai Asap Koyan, Belaga, ditu ensanus.

    Berebak enggau program nya, bisi 31 iku penyelaras PPP ari serata nengeri udah nerima surat mangku pengawa sida empu dikena bejalaika pangku pengawa bekaul program pekara pengguna sereta seruran ngulihka pengawa nyadi kaban FOK.

    Seraya madahka atur pejalai FOK engkeman endar ba timpuh iya, Hamzah ngarapka kesemua penyelaras deka bejalaika pangku pengawa ti dilempai ngagai sida memanah ngambika mantu ngurangka isu sereta penanggul bekaul pekara pengguna kelebih agi ba peranak di kandang menua ulu di nengeri tu.

    “Program tu endang nyadi antara inisiatif KPDNKK di serata Malaysia nentuka semua peranak tauka raban ti meli dijaga ngambika sida enda ditipu sekeda raban pedagang ti deka beambi ulih nadai ngira pangka ketegal ulah nadai tanggungpengawa nya,” ku terang iya nyemetak.

    Nangkan nya, iya mega meransang semua komuniti di menua tu nyadi kaban FOK nentuka sida ulih nyadi mata enggau pending ngagai KPDNKK di kandang menua tauka di pelilih menua sida empu.
    Dataika sehari tu ku iya, bisi 49, 475 iku udah rejista nyadi kaban FOK di serata nengeri Sarawak ke alai penyampau kesemua kaban FOK di serata menua manggai 800,000.

    Berebak enggau nya, iya mega bisi ngemendarka geran perintah penyampau RM100, 000 sereta RM10, 000 da agi ari Sapit Menteri KPDNKK, Dato’ Henry Sum Agong ti deka diagih ngagai akaun Komiti Pemansang Enggau Pengelikun Genturung Pendiau (JKKK) Uma Balui Ukap, Sungai Asap, Belaga.

    Sama bisi datai Kaban Parlimen (MP) Ulu Rajang Datuk Wilson Ugak Kumbong, Kaban Kunsil Nengeri (ADUN) Murum, Kennedy Chukpai Ugon enggau Sapit Ketuai Sekretari (Ngatur Pengawa enggau Pekara Bebeli Barang) KPDNKK Dato’ Razali Haji Othman. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads