Header Ads

  • Baru Nyadi

    Perintah komited mantu nyungkak asil pekebun lada

    BEJADI: Idris nuangka leka lada ngagai Mesin Ngupas Kulit Lada 3-dalam-1 ke baru dipenyadika iya, seraya diperatika (kanan) Mary enggau ke bukai.

    KUCHING: Perintah nengah pengawa mansik deka terus mantu pekebun lada nengeri tu nyungkak asil lada Sarawak enggau penatai pemisi seraya deka ngenukuka komoditi nya ti pemadu manah di dunya.

    Menteri Pelajar Tinggi Malaysia, Datuk Seri Idris Jusoh madah, dikena nyapai juluk nya opis menteri ngungkupka belanja dikena mungkal projek pemansik Sarawak Pepper Farm @UPM Bintulu nengah kerejasama Universiti Putra Malaysia (UPM) nempa kerejasama enggau Opis Lada Malaysia (MPB).

    Iya madahka nengah projek nya UPM ulih mantu sereta bekunsi penemu, chara ngutur nyengkaum chara maja lada, mansik sereta chara nyual enggau ke bukai ngagai pekebun lada di nengeri tu.

    “Aku madah ngagai UPM kitai deka meri geran dikena mansik sepenyampau RM1 juta (projek pemansik Sarawak Pepper Farm @UPM Bintulu), kitai nemu penyampau nya endang enda chukup,aku deka berandau enggau sapit menteri aku enggau ketuai direktor, nyema bisi pematut penyampau nya deka ditambah jemah ila.

    “UPM bisi komitmen tinggi deka meda pemujur enggau penyungkak asil lada Sarawak, deka meda lada Sarawak pulai baru ngagai jeman tebilang iya nya lada ti pemadu manah di dunya.

    “Pengawa mansik tu deka dipajak dikena nentuka pekebun lada ulih terus dikemeratka. Nengah projek tu pekebun bisi pengarap ke alai lada Sarawak nya lada ti pemadu manah di dunya lalu ari nya pekebun deka meri komitmen ngenukuka projek tu nyulut,” ku iya.

    Idris mansutka penemu nya lebuh ke bejaku seraya bejadika ‘Penyelidikan Translasional : Projek Penyelidikan Lada Sarawak dan Pembangunan Ladang Penyelidikan & komoditi’ di UPM Kampus Bintulu, ke diatur UPM ba sebuah hotel ditu, kemari.

    Kelimpah ari ngemataka pengawa nyain sempekat pemereti ati (MoU) entara UPM enggau MPB, Idris nyerumba pengerami nya diberi basa nyuaka Skim Penyulut Pemansuk UPM ngagai dua iku pengelicha UPM Kampus Bintulu.

    Nambahka nya, bisi lima iku nembiak udah dipilih nerima Gelar Nembiak Nyulut (anak pekebun lada), bepelasarka pemutus akademik sereta ulah diri ke manah.

    Idris mega diberi basa bejadika Mesin Ngupas Kulit Lada 3-dalam-1 dipaten dikena 10 hari proses ngeluarka lada burak.

    Ba pengerami ke sama, Menteri Muda Pelajar enggau Pemansik Teknologi, Dr. annuar Rapaee madahka perintah nengeri merambu deka numbuhka Sarawak Research Council Ordinan lalu pekara nya deka dibantaika ba aum Kunsil Nengeri bulan November tu ila.

    Iya madah enti SRC ditumbuhka, nya deka nyadi pelasar ngangkatka pengawa pemansik di Sarawak.

    “Pekara bekaul enggau Sarawak Research Council Ordinan deka dibantaika maya baum kunsil nengeri bulan November tu, nganti maya nya baru meri penerang silik.

    “Dalam ordinan nya bisi 10 kluster lalu seiti ari kluster nya iya nya lada ti deka dikemeratka dikena ngenukuka asil pemansut enggau kualiti lada Sarawak,” ku iya seraya meransang pekebun lada nengeri tu meri kerejasama ngagai UPM Kampus Bintulu.

    Dipelabaka nengeri tu ulih ngeluarka asil lada sepenyampau 31,000 metrik tan lebuh manggai ba ujung taun tu. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads