Perintah nengeri nerima RM8.4 billion perambu puku - Berita Iban Online | Laman Web Berita Kitai

Header Ads

  • Baru Nyadi

    Perintah nengeri nerima RM8.4 billion perambu puku

    TERIMA KASIH: Awang Tengah (tiga kiba) nyuaka tepa ngagai seiku panel SBIS Ke-4 ditu, lalu bela digulu sekeda pemesai bukai.

    KUCHING: Dalam kandang semilan bulan keterubah taun tu, perintah nengeri udah nerima perambu puku manggai penyampau RM8.4 billion, lalu penyampau tu enda nyengkaum sadang projek ‘steel’ urung USD3 billion, enggau projek methanol di Bintulu, USD2 billion.

    Sapit Kepala Menteri Datuk Amar Awang Tengah Ali Hasan madah penyampau nya tanda ke manah lalu perintah nengeri ngarapka mayuh agi orang tauka industri ari menua bukai deka majak nanam puku sida di menua tu, kelebih agi industri bepelasarka kuasa.

    “Setipak enggau gaya ekonomi dunya ke enda berapa manah, penyampau puku ke dikemendarka dalam pampang industri ngaga barang di Malaysia diperatika bisi kurang sereta enda berapa manah dalam taun 2016.

    “Tu meri empas ngagai penyampau puku ke di Sarawak ke turun ngagai RM4.7 bilion dalam taun 2016.

    “Taja pia, ke pemun semilan bulan ke terubah taun tu, Sarawak nerima perambu puku dalam penyampau RM8.4 bilion,” ku iya.

    Awang Tengah madah munyi tu lebuh bejaku ngarika Kepala Menteri Datuk Patinggi Dr Abang Johari Tun Openg, muka Aum Besai Pengawa Dagang enggau Puku Sarawak (SBIS) Ke-4 ditu, bedau lama.

    Iya nandu baru madahka, pemisi industri baka ke udah dibuka di Samalaju, baka industri ngaga aluminium, ferroaloi enggau silikon polikristalin udah ngeletakka Sarawak ba penuduk ke manah kena ngemansangka pengawa industri bansa tu ke industri bukai.

    Nengah Atur Pemansang Melaysia Lumpar ke-11 (RMK11) ku iya, dalam kandang 2016-2020, perintah nengeri udah ngemendarka ungkup urung RM20 billion kena ngaga mayuh macham projek pemansang.

    Lalu nambah penyampau nya mega, perintah besai udah mega ngemendarka ungkup urung RM24.6 billion baruh ‘First and econd Rolling Plans’ (2016-2018), lalu entara projek besai nya ti digaga di Sarawak, mungkur Pan Borneo Highway (RM16.5 billion), Tekad Ai Murum Hidro Elektrik (RM4.1 billion); Tekad Ai Balleh (RM8.0 billion), ‘Transmission Line’ (tulang belakang) (RM2.7 billion), Samalaju Industrial Port (RM1.8 billion), enggau Samalaju Industrial Park (RM1.0 billion).

    “Perintah nengeri deka majak nyendiaka pengawa nanam puku peribit. Kami pan nemu pampang peribit tauka swasta bisi perengka guna ke ulih dikena sida iya baka, modal, teknologi ke pengabis baru sereta pengelandik, baka ke udah digaga ba mayuh pemansan ekonomi.

    “Lalu tu mega setipak enggau pemerat Program Transformesyen Sosio-Ekonomi (SET),” ku iya.

    Awang Tengah ti mega nyadi Menteri Pemansang Pengawa Industri enggau Pengawa Dagang madahka, baka kediatu, Perintah Menua benung ngaga inisiatif transformesyen mungkur mayuh bengkah ekonomi baka pengawa betanam betupi, pengawa ngaga barang, pengawa dagang temuai, pemansang mengeri, dagang, enggau rampa menua.

    “Entara nya, pampang betanam betupi deka diubah nengah chara moden, digaga nuadi komersil, sereta ngena perengka guna teknologi digital... Nengah inisiatif tu, dikarapka menua tu ulih matak mayuh agi pukuk swasta dalam pengawa betanam betupi,” ku iya.

    Iya nandu baru madahka Sarawak deka mekuh ngagai pengawa bio- ekonomi ke nyengkaum ngena ‘biomas’ nyadi kuasa ke ulih dikena baru.

    Ku iya, Sarawak ke bepengeraja enggau pemisi rampa menua asal, bisi peluang ulih dikena dalam farmasitikal sereta ubat, tang pemerat tu bedau dipansik tauka diuji.

    Ketegal nya ku iya, Sarawak deka ngaga kunsil pansik ngambika ulih meransang sereta ngemutarka pengawa pansik sereta pemansang (R&D) di menua tu.

    Iya madah, ambika chunto baka Palan Pansik Lembah Bio di Universiti Curtin, Miri digaga enggau penyampau RM60.6 juta udah tembu digaga lalu iya nyendiaka perengka guna baka inkubator kena ngaga R&D.

    “Aku ngarapka pampang swasta deka bulih penguntung ari tu, baka ke udah disedia ulih Palan Pansik Lembah Bio tu kena bejalaika R&D dalam farmasitikal enggau pengawa berubat,” ku iya.

    Sama bisi enggau ngulu atur pengawa nya kemari, Menteri Kereja Datuk Seri Fadillah Yusof, Menteri di Opis Menteri Besai, Datuk Seri Nancy Shukri, Menteri Wang Kedua Dato Sri Wong Soon Koh enggau Ketuai Pegawai Eksekutif Asia Strategic Leadership Institute (ASLI) Tan Sri Dato’ Dr. Michael Yeoh. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads