Header Ads

  • Baru Nyadi

    Petronas komited deka ngangkatka tikas pemanah pelajar di Sarawak

    Logo Petronas Carigali Sdn Bhd
    MIRI: Petronas terus komited ngemansangka pemanah tikas pelajar di Sarawak enggau melanja sekula sereta nembiak ti nyulut dalam akademik.

    Menijar Besai Kanan Petronas Carigali Sdn Bhd (PCSB), Anuar Ismail madah piak sida melanja lima buah sekula di Pelilih Lundu nengah program ‘Sekolah Amanah’.

    Pia mega, lebih 46 iku peranak Sarawak udah bulih pemaik ari ‘Program Penajaan Pendidikan’ ti nampung pelajar ngagai universiti di menua tu enggau menua luar.

    “Petronas mega bekerejasama enggau Majlis Amanah Rakyat (MARA) ngambi ngiga penuduk 150 iku nembiak nyulut nerima pelajar menyana di Maktab Rendah Sains Mara Sarawak,” ku iya rambau atur ‘Program Sentuhan Ilmu Petronas’ (PSIP) enggau ‘Program Kembali Ke Sekolah’ ditu, ensanus.

    Ku Anuar nambah, Petronas mega keran ngemansangka pengelandik teknikal ngagai raban nembiak nengah ‘Program Penajaan Bantuan Latihan Vokasional’ (VISTA).

    “Kenyau ari taun 2007, lebih 1,100 iku pelatih ari raban nembiak Sarawak udah nerima pemaik ari VISTA lalu tu komitmen Petronas ngemansangka raban nembiak,” ku iya.

    Nangkan nya, Petronas mega bisi nyuaka pemeri kereban dikena besekula ngagai 116 iku nembiak ungkup besekula 2018.

    “Tu nyengkaum gari sekula, kantung enggau kereban nulih dikena nangkup peminta bala nembiak lalu iya ngelempungka tating belanja apai indai nembiak nya,” ku iya.

    Bala nembiak sekula ti nerima bantu nya nyadi pesereta PSIP diatur Petronas ke diatur pengelama dua hari di Miri.

    Atur pejalai STEM seriris enggau pengawa Opis Menteri Pelajar Malaysia ti nagit nisbah 60:40 ba penama dalam bidang sains, teknikal, vokasional enggau seni.

    Pengawa bejadi program udah dipenyadi Menteri Muda Orang Indu, Ruang Bilik enggau Pemansang Anak Mit, Rosey Yunus. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads