Header Ads

  • Baru Nyadi

    Projek PPRT di Sungai Bedaun disadang tembu dalam 2019

    RUMAH PPRT DIGAGA DIN : Abang Johari (tengah) nunjuk tunga taba ti deka alai ngagai rumah PPRT, Bela bisi dipeda (ari kiba ke kanan) Dr. Abdul Tahman, Ismail Sabri, Sajeli enggau Alexander.

    SANTUBONG: Komuniti Melayu ke diau di genturung pendiau Kampung Panglima Seman Lama, Semarang enggau Pulo Hulu di Bandaraya Kuching dipelabaka ulih pindah ngagai pengentap baru di Sungai Bedaun di Jalai Sultan Tengah di sitak Santubong dalam timpuh dua taun ke deka datai (2019).

    Kepala Menteri Datuk Patinggi Abang Johari Tun Openg madahka dalam aum iya enggau Opis Menteri Pemansang Menua Pesisir, enggau Kandang Menua (KKLBW), Perintah Besai nengah opis meenteri nya setuju ngaga rumah PPRT (Projek Pengawa Berumah Rayat Seranta) di Kampung Bedaun, tang infrastruktur bukai deka disediaka Perintah Nengeri.

    “Konsep rumah PPRT tu konsep rumah model baru, lalu KKLBW udah besetuju enggau perambu Perintah Nengeri ti deka nyendiaka taba rumah, infrastruktur nyengkaum utiliti ba sitak nya lepas dikemansangka nengah PPRT.

    “KKLBW semina ngaga rumah aja, lalu enti diperatika ari rega rumah tu ila, manggai urung RM68,000. Ungkus tanah enggau utiliti deka dibayar Perintah Nengeri,” ku Abang Johari seraya madah genturung pendiau nya ila ungkup sida ke kurang penatai pemisi.

    Iya madah munyi nya lebuh dikerandau pengudah mendingka licha ari Menijar Besai PELITA, Datu Sajeli Kipli lebuh iya sereta Menteri KKLBW Datuk Seri Ismail Sabri Yaakob enggau sekeda pemesai bukai ngelawa endur alai ngagai rumah PPRT di Kampung Sungai Bedaun semak ditu, kemari.

    Abang Johari ti mega nyadi Menteri Pemansang Mengeri sereta Rampa Menua nyerumba genturung pendiau Sungai Bedaun nya sebuah genturung pendiau ke moden napi ruang bilik ke besai sereta sida ke enda ulih meli rumah di sitak Darul Hana.

    Di genturung pendiau Sungai Bedaun nya ila deka nyendiaka urung 300 unit rumah ke tiga buah kampung nya ila, ba atas tanah dalam pemesai 195 ikar, lalu pemesai tanah alai sebuah rumah urung 10 ngagai 12 puin sebuah.

    Sebedau nya, Menijar Besai PELITA, Datu Sajeli Kipli madah tu chara baru mantu rayat ke ngembuan kurang pemisi ke diau di Bandaraya Kuching, iya nya ngaga Rumah Mesra Rakyat (RMR), ‘kampung extension’ ke nyadi model baru, ku iya.

    “Tu sebagi ari pemansang Darul Hana, pemansang ke digaga ke genturung pendiau niti Sungai Sarawak, ari alai pemesai tanah 195 ikar, 43 ikar digaga ke tiga buah genturung pendiau nya.

    “Kami beratika bisi ruang bilik ke meskin seranta diau di sitak nya (di ketiga-tiga buah genturung pendiau nya) , alai kami bulih penemu ngaga rumah bansa tu ke ruang bilik besai (extended families),” ku iya, ke bisi meri licha pasal pemansang Kampung Sungai Bedaun nya ngagai Kepala Menteri, Ismail Sabri enggau sekeda pemesai bukai.

    Penyampau rumah ba sitak nya ila deka mungkur urung 508 rumah nyengkaum ke deka digaga dulu, 300 buah ke ketiga buah genturung pendiau dalam dua fasa.

    “Laluh ari penyampau nya ke bedau digaga, agi nganti pemendar ari KKLBW. Perintah Menua nengah PELITA semina nyendiaka infrastruktur enggau utiliti baka surau, jalai sereta perengka guna bukai,” ku iya.

    Sama bisi enggau ngulu atur pengawa nya kemari, Sapit Kepala Menteri Datuk Amar Douglas Uggah Embas, Menteri Pengeraja Asal enggau Rampa Menua Datuk Seri Wan Junaidi Tuanku Jaafar, Sapit Menteri Pemansang Menua Pesisir enggau Menua Tengah, Datuk Alexander Nanta Linggi, enggau Menteri Muda Menua Pesisir (Elektrik) Dr. Abdul Rahman Junaidi. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads