Ripot Pansik Instrumen penyendia nembiak pra-sekula belajar formal dipelaba tembu Disember tu - Berita Iban Online | Laman Web Berita Kitai

Header Ads

  • Baru Nyadi

    Ripot Pansik Instrumen penyendia nembiak pra-sekula belajar formal dipelaba tembu Disember tu

    KUCHING: Universiti Institut Teknologi Mara (UiTM) kemari nyain sempekat pemereti ati (MoA) enggau Perintah Menua Sarawak nengah Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, ngaga siti instrumen beratika penyendia belajar, sereta beratika sebarang penanggul ke ditapi ulih anak mit ke belajar di pra-sekula, sebedau sida iya masuk sekula formal (masuk Primeri Satu).

    Opis Menteri nya, Dato Sri Fatimah Abdullah madah, ba perintah nengeri, pansik tu berat laban baruh Pemansang Anak Mit, utai ke digaga di renggat pra-sekula, enda tau enda bisi penyambung (ada kesinambungan), nyendiaka nembiak sekula ke ba tikas pra-sekula nyambung pelajar sida iya ngagai renggat nangkan nya.

    “Pelajar di pra-sekolah, pengawa sereta tanggung pengawa sida iya, nyendiaka anak mit ke sekula ke endar (formal schooling).

    Baka di pra-sekula, nya ke dikumbai ‘informal’ laban utai ke dipelajar anak mit nya, pelajar ke ngerinduka ati, bemain, belakun, ngaga chura sereta mayuh macham aktiviti bukai.

    “Nya alai, kitai deka beratika anak mit kitai di pra-sekula nya besedia tauka enda masuk sekula ke endar,” ku Fatimah.

    Iya madah munyi nya lebuh seraban akademik sereta tukang pansik ari UiTM bisi ngelawa Fatimah di opis menteri nya di Bangunan Baitulmakmur ditu, kemari.

    Iya nandu baru madahka, pemisi instrumen nya ila deka madahka ni naka penyendia bala nembiak pra-sekula besedia deka nyambung ngagai tikas ke endar.

    “Lalu enti ditemu ari pansik nya, bisi ke enda besedia, baka ripot ke diterima pasal instrumen sereta pansik tu, ni baka pemerat ke deka digaga kitai, laban enti bisi penanggul, ngemutarka penanggul nya enda tau enda di renggat sekula primeri.

    “Enti kitai udah bisi instrumen tu ila, iya ulih dikena kitai kena nguji tikas penyendia anak mit lebuh sida iya ba pra-sekula tauka ba primeri satu,” ku iya, lalu nandu baru pansik instrumen tu dipelabaka tembu ujung taun tu.

    Pansik tu mega ulih dikena bala pengajar di pra-sekula ngambika sida iya nemu ni naka penyendia bala anak mit ke diajar sida iya, besedia masuk ngagai Primeri Satu.

    “Enti sema anak mit nya dipeda udah abis pra-sekula tang enda sedia masuk primeri Satu, ba sentang tu mega opis menteri nya minta sadang ari UiTM bakani deka ngemutarka nembiak bansa tu.

    “Kurikulum, di pra-sekula enda sebaka enggau Primeri Satu laban primeri satu nya, gaya iya formal, lalu siti agi informal, kedua-dua gaya ke enda sebaka.

    “Anak mit ukai di ada di bulan ke sebaka, taja pan sida iya berumur 7 taun, tang ari sukut pemansang mental sida iya, tiap iku anak mit enda sebaka,” ku iya.

    Sebedau nya Rektor UiTM Prof Datuk Jamil Hamali madahka ngaga instrument tu deka beratika penanggul bala anak mit enti sida iya besedia tauka enda masuk pelajar primeri.

    Instrumen tu diatu benung digaga lalu dikarapka tembu ujung taun tu ila.

    Pansik tu digaga ulih tukang pansik ari UiTM, Dr. Hwa Tee Yong, Nor Hazizah Julaihi, enggau Chan Ai Nyet.

    Sama bisi enggau ngulu atur pengawa nya kemari, Sekretari Mendam KKMKWKPKK, Dr. Saadiah Abdul Samat, Penulung Direktor Opis Pelajar Menua Sarawak, Mohd Rezali, enggau Siti Zaleha Reduan, ari opis menteri nya empu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads