Header Ads

  • Baru Nyadi

    Sarawak bisi penau nyadi palan nempa atlit gumpal isi kelas dunya

    MIRI: Sarawak bisi penau nyadi palan kelas dunya ungkup main gumpal isi asal aja raban nembiak bisi dilatih enggau betul, diet sereta bisi juluk deka nyingkang jauh ngagai pekit antarabansa.

    Pemenang midul pirak Mr. World 2017, Malvern Abdullah ari Sarawak madah bisi mayuh pemain gumpal isi nembiak bepenau di nengeri tu lalu dipechaya sida tu ulih nyingkang jauh nyapai penyukut dudi hari enggau latih ti meruan sereta sukung ari perintah.

    “Aku ngelalau sida (raban nembiak) ngambika belatih, makai sereta belepa enggau patut laban nadai jalai muntang nuju penyulut. Anang putus pengarap, orang ti badu nadai kala menang lalu orang ti menang nadai kala badu,” ku Malvern lebuhka dirandau kemari.

    Nitih ku Malvern, pemain gumpal isi meseti ngemeranka sains dalam latih enggau pemakai sida nentuka isi sida kering sereta gaya gumpal isi ti patut bisi ba tubuh sida.

    Ku iya, nyadi siku ari sekeda veteran pemain gumpal isi di Sarawak, iya beratika mayuh pemain gumpal isi bepenau di nengeri tu ti ulih nampung pengawa kitai dudi hari di renggat Malaysia sereta mega jauh agi ngagai renggat dunya.

    Pia mega ku iya, nyadi main ti chukup mar ke alai pemain gumpal isi patut seruran ngembuan batang tu ari pemakai, latih enggau diet pemakai, suplimen, nya kebuah perintah tau mantu meri belanja, sukung, penyikap perengka guna enggau kereban latih nentuka raban gumpal isi kitai ulih nitihka singkang main tu.

    “Aku berasai gaga meda mayuh raban gumpal isi ari tetiap bagi menua di Sarawak bepekit di Sarawak enggau mega tikas Malaysia diatu, sereta bepekit enggau raban senior gumpal isi,” ku iya.

    Ngelansa pasal penyapai iya apin lama ke udah dalam Mr World 2017 di Mongolia, Malvern madahka diri chukup gaga bulih pirak ungkup Malaysia.

    Ku iya, nya ukai pengawa ti muntang lalu iya mujur ngetanka pemanah ‘persembahan’ iya enggau raban gumpal isi ti manah di dunya.

    “Tu pekit ti semak endar enggau pemutus iya mega semak ba kategori disereta aku, ke alai aku nerima midul pirak,” ku iya.

    Siku da agi pemain gumpal isi Sarawak, Buda Anchah, ti bulih penuduk keempat dalam Master enggau penuduk kelima dalam Kategori Light Weight Mr World 2017 madah, ngagai rebak baru pemain gumpak isi di nengeri tu, sida meseti ngembuan semangat tinggi, disiplin enggau latih ti sistematik ngambika nyadi pemain gumpal isi ti nyulut.

    “Jauhka diri ari steroid lalu berengkah enggau diet, latih enggau makai pemakai diet enggau suplimen dikena nyapai pemutus ti manah,” ku iya lebuhka ngelansa pasal nyadi pemain gumpal isi ti bisi disiplin.

    Nitih ku Buda, perintah nengeri tu meseti datai nyukung kelebih agi Opis Menteri Nembiak enggau Lumba ngambika nyukung main tu laban Sarawak dikelala nyadi palan ungkup nempa pemain gumpal isi laban nama lagenda dulu suba, Bujang Taha, meruan dikenang datai ke sehari dalam pekit kelas dunya.

    Enggau penuh basa ku iya, semua raban meseti mantu sereta nyukung sida nyengkaum ari sukut belanja atlit pemain gumpal isi nyadi pemekit kelas dunya. #UtusanBorneo

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads